पाकिस्तान (Pakistan) मध्ये गृहयुद्धासारखी परिस्थिती निर्माण झाली आहे. पाकिस्तान निषेधाच्या आगीत जळताना सर्व जगाला दिसून येत आहे. इम्रान खान (Imran Khan) यांचा शाहबाज शरीफ (Shehbaz Sharif) सरकारवर हल्लाबोल सुरूच आहे. (Violence erupts in Islamabad over Imran Khan independence march)

नव्या निवडणुकांच्या मागणीसाठी पाकिस्तानचे माजी पंतप्रधान इम्रान खान यांचा आझादी मार्च इस्लामाबादला जाऊन धडकला होता. हजारोंच्या संख्येने जमलेल्या पीटीआय समर्थकांचा हा मेळावा रात्री उशिरा पाकिस्तानच्या राजधानीत दाखल झाला तेव्हा बराच वेळ जाम लागला होता.

मात्र, प्रवेशापूर्वी मोठा हिंसाचार झाला म्हणायला हरकत नाही. इम्रान खान यांच्या समर्थकांनी इस्लामाबादमधील मेट्रो स्टेशनला देखील आग लावली. यानंतर तेथे आगीच्या उंच ज्वाळा निघत होती. असेच काहीसे चित्र बुधवारी पाकिस्तानातील विविध शहरांमधून समोर आले आहेत.

कराची असो, लाहोर असो तर हजारोंच्या संख्येसह इमरान खान आणि त्यांची पक्ष पीटीआयचे समर्थक रस्त्यावर उतरत आहेत. इम्रान खान समर्थकांना रोखण्यासाठी मोठा पोलीस बंदोबस्त देखील तैनात करण्यात आला होता. अश्रुधुराच्या नळकांड्या फोडण्यात आल्या, लाठीचार्ज देखील करण्यात आला. प्रत्युत्तरात संतप्त समर्थकांनीही दगडफेक केली आहे. त्याचवेळी शेकडो कार्यकर्त्यांना अटकही करण्यात आली आहे.