पाकिस्तानच्या अशांत सीमावर्ती भागात दहशवाद्यांनी पुन्हा एकदा रक्ताचा खेळ खेळला आहे. अफगाणिस्तान सीमेजवळील मीरानशाह भागात एका आत्मघातकी हल्लेखोराने स्फोटकांनी भरलेली दुचाकी लष्करी चौकीवर धडकवली. या भीषण स्फोटात १८ लोकांचा बळी गेला असून, मृतांमध्ये ५ लहान मुलांचा समावेश असल्याने परिसरात हळहळ व्यक्त होत आहे. या हल्ल्यात ३० हून अधिक नागरिक गंभीर जखमी झाले असून त्यांच्यावर स्थानिक रुग्णालयात उपचार सुरू आहेत.

भीषण स्फोटाने बाजारपेठ हादरली

हा हल्ला काल सायंकाळी साडेचार वाजेच्या सुमारास मीरानशाह येथील 'चश्मा पुल' भागात झाला. प्रत्यक्षदर्शींनी दिलेल्या माहितीनुसार, आत्मघातकी हल्लेखोर दुचाकीवरून आला आणि त्याने थेट लष्करी तपासणी नाक्याला (चेक पोस्ट) धडक दिली. स्फोट इतका शक्तिशाली होता की, दुचाकी आणि चौकीचे अक्षरशः तुकडे झाले. बाजारपेठेत गर्दीची वेळ असल्याने स्फोटामुळे अनेक दुकानांना भीषण आग लागली, ज्यामध्ये अनेक नागरिक होरपळले गेले.

हाफिज गुल बहादूर: हल्ल्याचा मुख्य सूत्रधार

या क्रूर हल्ल्याची जबाबदारी 'उस्तुद उल खोरासन' (USK) या दहशतवादी संघटनेने स्वीकारली आहे. ही संघटना 'इत्तिहाद उल मुजाहिदीन पाकिस्तान' (IMP) शी संबंधित असून, ज्याचा प्रमुख कुख्यात दहशतवादी हाफिज गुल बहादूर आहे. बहादूरनेच या आत्मघातकी हल्ल्याचा संपूर्ण कट रचला होता. या गटाने पाकिस्तानातील बाजारपेठेत लष्करी चौकीला लक्ष्य करून सर्वसामान्यांच्या जीवाशी खेळ केला आहे.

मसूद अजहर आणि ISI कनेक्शन उघड

तपासातून समोर आलेल्या माहितीनुसार, मास्टरमाइंड हाफिज गुल बहादूरचे संबंध जैश-ए-मोहम्मदचा म्होरक्या मसूद अजहरशी आहेत. विशेष म्हणजे, बहादूरला पाकिस्तानची गुप्तचर संस्था 'ISI' ने प्रशिक्षण दिले होते. मसूद अजहरच्या बन्नू येथील प्रशिक्षण केंद्रात त्याने दहशतवादाचे धडे गिरवले होते. अफगाणिस्तानातून पाकिस्तानात आलेल्या बहादूरने मसूद अजहरच्या साथीने भारतात, विशेषतः काश्मीरमध्ये दहशतवादी हल्ले करण्यासाठी अनेक अतिरेकी तयार केले होते.

मदरशांमधून दहशतवादाचे पीक

हाफिज गुल बहादूर स्वतःचा मदरसा चालवत असे, जिथे तरुणांचे ब्रेनवॉश करून त्यांना दहशतवादी कारवायांसाठी तयार केले जात असे. लाल मशीद प्रकरणानंतर जेव्हा 'तहरीक-ए-तालिबान पाकिस्तान' (TTP) अस्तित्वात आली, तेव्हा बहादूर त्यामध्ये सामील झाला आणि त्याने पाकिस्तान सरकारविरुद्धच युद्ध पुकारले. आज हीच दहशतवादाची फॅक्टरी स्वतः पाकिस्तानसाठी डोकेदुखी ठरली आहे.