सूर्याच्या पृष्ठभागावर निर्माण झालेलं सौर वादळ (Solar Storm) वेगाने पृथ्वीकडे येत असल्याची माहिती नासाने दिली आहे. या वादळाचा वेग पाहून 'नासा'च्या (NASA) शास्त्रज्ञांनी सतर्कतेचा इशारा दिला आहे. सूर्यापासून निघालेल्या या ज्वाळेचा वेग ताशी 10 लाख मैल किंवा 160000 किलोमीटर वेगानं अंतराळात प्रवास करत आहेत. येत्या काही दिवसांत हे कण पृथ्वीच्या वातावरणाला धडकण्याची शक्यता दर्शवली आहे. याचा परिणाम पृथ्वीच्या दक्षिण भागात दिसून येऊ शकतो, असे शास्त्रज्ञांचे मत आहे. (Solar Storm News)

या आठवड्याच्या शेवटी सौर वादळामुळे काही तुकडे पृथ्वीवर धडकण्याची शक्यता शास्त्रज्ञांनी दर्शवली आहे. वादळाच्या या ज्वाळांच्या लाटा पृथ्वीवर धडकल्यानंतर अनेक समस्या निर्माण होऊ शकतात. सूर्याच्या (Sun) पृष्ठभागावर किरणोत्सर्गाच्या शक्तिशाली स्फोटांमुळे निर्माण झालेल्या या सौरज्वाळा तात्पुरत्या काळासाठी संचार आणि नेव्हिगेशन ब्लॅकआउटसाठी कारणीभूत ठरून जगातील अनेक ठिकाणी वीज प्रवाह बंद होण्याची शक्यता आहे. "आमच्या सौर वेधशाळांचे नेटवर्क आम्हाला अवकाशातील हवामानातील होणाऱ्या घडामोडीचा मागोवा घेण्यास मदत करते, ही समाधानाची बाब आहे', असं म्हणत नासाने (NASA) दिलासा दिला आहे.

* सौर वादळाचे काय परिणाम होऊ शकतात

सौर वादळ हे धोकादायक असू शकते. सौर वादळांमुळे पृथ्वीवरील वातावरणात अधिक वाढ होऊ शकते. याचा थेट परिणाम उपग्रहांवर होऊ शकतो. यामुळे जीपीएस नेव्हिगेशन, मोबाईल फोन सिग्नल आणि सॅटेलाइट टीव्हीमध्ये अडथळा येऊ शकतो. वीज प्रवाहीत करणाऱ्या तारांमध्ये करंट तीव्र झाल्यामुळे ट्रान्सफॉर्मरमध्ये बिघाड येऊ शकते.