Russia-Ukraine War: रशियाने युक्रेनवर केलेल्या हल्ल्याला 6 महिन्यांहून अधिक काळ लोटला आहे. त्याचबरोबर पाश्चात्य देशांनीही रशियावर अनेक प्रकारचे निर्बंध लादले आहेत. असे असूनही रशियाचे राष्ट्राध्यक्ष व्लादिमीर पुतिन म्हणतात की, 'या युद्धाने केवळ फायदाच झाला. यामुळे रशियाचे जगावरील वर्चस्व वाढेल.' सोव्हिएत युनियनच्या विघटनानंतर युक्रेनविरुद्धची ही 'विशेष लष्करी कारवाई' एक टर्निंग पॉइंट असल्याचे पुतीन यांनी म्हटले आहे.

दरम्यान, रशियाच्या (Russia) पॅसिफिक सिटी व्लादिवोस्तोव येथे ईस्टर्न इकॉनॉमिक फोरममध्ये पुतीन बोलत होते. त्यांनी आपल्या भाषणात युक्रेनचा (Ukraine) फारसा उल्लेख केला नाही. मात्र, युक्रेनबाबत विचारले असता त्यांनी सांगितले की, 'या युद्धाने केवळ फायदाच झाला, नुकसान नाही.'

पुतिन पुढे म्हणाले की, 'आमचे काहीही नुकसान झाले नाही आणि यापुढेही होणार नाही. अनावश्यक आणि हानीकारक अशी कारवाई होणार नाही. या युद्धामुळे आमचे सार्वभौमत्व अधिक भक्कम झाले. याशिवाय देश आतून मजबूत होईल.' या युद्धामुळे रशियामध्ये आणि जगभरात ध्रुवीकरण झाले आहे, हेही त्यांनी मान्य केले.

तसेच, 24 फेब्रुवारी रोजी रशियाने युक्रेनवर आक्रमण केले होते. रशिया त्याला 'स्पेशल ऑपरेशन्स' म्हणतो. युक्रेनियन सैन्याला रशियाचा सामना करावा लागला. या युद्धात दोन्ही बाजूचे अनेक सैनिक मारले गेले आहेत. युक्रेनने अद्याप शरणागती पत्करलेली नाही.

त्याचवेळी, पुतिन या युद्धातून बरेच काही मिळवण्याबाबत बोलत आहेत. तर दुसरीकडे, नाटोने या युद्धाविरोधात मोठी तयारी सुरु केली आहे. नाटोने पूर्व युरोपमध्ये आपली स्थिती मजबूत केली आहे. आता स्वीडन (Sweden) आणि फिनलंडला (Finland) सदस्य म्हणून समाविष्ट करण्याची योजना नाटोने आखली आहे. तर रशियाचा युक्रेनवरील हल्ला नाटोला रोखण्याच्या उद्देशाने होता.