PM Shehbaz Sharif Video: पंतप्रधान नरेंद्र मोदींप्रमाणेच पाकिस्तानचे पंतप्रधान शाहबाज शरीफ हेही सध्या परदेश दौऱ्यावर आहेत. पाकिस्तानचे पंतप्रधान शरीफ फ्रान्सच्या दौऱ्यावर असून पॅरिसमध्ये दोन दिवसीय न्यू ग्लोबल फायनान्सिंग पॅक्ट समिटमध्ये सहभागी होण्यासाठी ते गुरुवारी राजधानी पॅरिसला पोहोचले.

मात्र, त्यांच्या आगमनानंतर पाकिस्तानच्या पंतप्रधान कार्यालयाने त्यांच्या स्वागताशी संबंधित एक व्हिडिओ पोस्ट केल्याने या व्हिडिओवरुन सोशल मीडियावर वाद निर्माण झाला आहे.

व्हिडिओमध्ये, पंतप्रधान शाहबाज शरीफ (Shehbaz Sharif) समिटमध्ये सहभागी होण्यासाठी पॅलेस ब्रोग्नियार्ट येथे पोहोचताना दिसत आहेत. पण पंतप्रधान शरीफ गाडीतून खाली उतरले तेव्हा तिथे जोरदार पाऊस पडत आहे. पंतप्रधानांसाठी एक महिला प्रोटोकॉल अधिकारी गाडीच्या बाहेर छत्री घेऊन उभी आहे.

पावसात भिजत सोडले

दरम्यान, छत्री घेण्यापूर्वी पंतप्रधान शरीफ महिला अधिकाऱ्याला काहीतरी बोलत असल्याचेही व्हिडिओमध्ये दिसत आहे. यानंतर ते महिला अधिकाऱ्याकडून छत्री घेतात आणि स्वतः छत्री धरुन पुढे जातात. ती महिला अधिकारी पावसात भिजत त्यांच्या मागे येते.

मात्र, पीएम शरीफ यांच्या या वागण्यावरुन सोशल मीडियावर नवी चर्चा सुरु झाली आहे. काही लोकांनी याला "Good Gesture" म्हणून संबोधले तर काहींनी त्यांचे वर्तन "निराशाजनक" असल्याचे मानले.

दुसरीकडे, पंतप्रधानांचे कौतुक करताना ट्विटरवर एका यूजर्सने म्हटले की, पंतप्रधान शाहबाज शरीफ त्यांच्या साधेपणासाठी ओळखले जातात. साधेपणाचे आणखी एक आदर्श ठेवत त्यांनी स्वतःच छत्री घेतली. आता हा व्हिडिओ सोशल मीडियावर (Social Media) तूफान व्हायरल झाला आहे.

पावसात एकटे का सोडले

मात्र, दुसऱ्या युजरला पंतप्रधानांचे हे वागणे आवडले नाही. सैथ अब्दुल्ला म्हणाले की, पंतप्रधानांनी त्या महिला अधिकाऱ्याला पावसात का सोडले? शाहबाज शरीफ, ही अत्यंत लाजिरवाणी बाब आहे. त्याचवेळी शहरयार एजाज या अन्य एका युजरनेही नाराजी व्यक्त करत महिलेला पावसात एकटे सोडल्याचे सांगितले. ही पाकिस्तानसाठी अत्यंत लाजिरवाणी बाब आहे.

तसेच, फ्रान्सचे राष्ट्राध्यक्ष इमॅन्युएल मॅक्रॉन यांच्या निमंत्रणावरुन पाकिस्तानचे पंतप्रधान शाहबाज शरीफ गुरुवारपासून सुरु झालेल्या दोन दिवसीय शिखर परिषदेत सहभागी होण्यासाठी पॅरिसमध्ये दाखल झाले आहेत.