Pakistan News: पाकिस्तानचे माजी पंतप्रधान इम्रान खान यांच्याविरोधात अटक वॉरंट जारी करण्यात आले आहे. इस्लामाबाद पोलिस ठाण्यात दाखल झालेल्या गुन्ह्याच्या संदर्भात मरगल्ला पोलिस ठाण्याच्या क्षेत्र दंडाधिकाऱ्यांनी माजी पंतप्रधानांविरुद्ध हे अटक वॉरंट जारी केले आहे. शुक्रवारी (30 सप्टेंबर) इम्रान खान इस्लामाबाद येथील सत्र न्यायालयात हजर झाले. त्यांनी अतिरिक्त सत्र न्यायाधीश जेबा चौधरी यांची माफी मागितली. खान यांनी एका प्रचारसभेत महिला न्यायाधीश जेबा चौधरी यांना धमकी दिली होती.

दरम्यान, 20 ऑगस्ट रोजी इस्लामाबादमधील (Islamabad) एका रॅलीदरम्यान, इम्रान खान (Imran Khan) यांनी त्यांचे सहकारी शाहबाज गिल यांच्याबरोबर झालेल्या गैरवर्तवणूकीबद्दल उच्च पोलीस अधिकारी, निवडणूक आयोग आणि राजकीय विरोधकांवर गुन्हा नोंदवण्याची धमकी दिली होती.

काय म्हणाले इम्रान खान?

इम्रान खान यांनी न्यायाधीश जेबा चौधरी यांच्याबद्दल म्हटले होते की, 'त्यांच्याविरुद्ध कारवाई होणार असल्याने त्यांनी स्वत: तयार राहावे.' दुसरीकडे, पोलिसांच्या (Police) विनंतीवरुन न्यायाधीश जेबा चौधरी यांनी शाहबाज गिल यांची दोन दिवसांची कोठडी मंजूर केली. रॅलीदरम्यान पोलीस उपमहानिरीक्षकांना आपण सोडणार नाही, अशी धमकीही इम्रान यांनी दिली होती.

माजी पंतप्रधानांवर गुन्हा दाखल

रॅलीनंतर 69 वर्षीय इम्रान खान यांच्यावर पोलीस, न्यायव्यवस्था आणि इतर राज्य संस्थांना धमकावल्याबद्दल दहशतवादविरोधी कायद्यांतर्गत गुन्हा दाखल करण्यात आला. याच प्रकरणी इम्रान खान शुक्रवारी इस्लामाबाद येथील सत्र न्यायालयात हजर झाले. मी न्यायदंडाधिकारी जेबा चौधरी यांच्याकडे माफी मागण्यासाठी आलो आहे, असे ते म्हणाले.