288 Indians Uncontactable Nepal Floods MEA: नेपाळ आणि तिबेटच्या सीमाभागातील विनाशकारी ढगफुटी आणि भीषण महापुरामुळे अत्यंत चिंताजनक परिस्थिती निर्माण झाली आहे. सुमारे 288 भारतीय नागरिक बेपत्ता असून त्यांचा अद्याप कोणताही संपर्क होऊ शकलेला नाही, अशी धक्कादायक माहिती भारताच्या परराष्ट्र मंत्रालयाने गुरुवारी दिली. या घटनेमुळे भारत सरकार सतर्क झाले असून बेपत्ता नागरिकांशी संपर्क साधण्याचे आणि त्यांच्या शोधासाठी स्थानिक प्रशासनाच्या मदतीने प्रयत्न सुरु आहेत. आपत्तीग्रस्तांच्या मदतीसाठी कंट्रोल रुम स्थापन करुन हेल्पलाइन सुरु करण्यात आली आहे.

परराष्ट्र मंत्रालयाने दिलेल्या माहितीनुसार, संपर्क तुटलेल्या 288 भारतीय नागरिकांमध्ये विविध राज्यांतील लोकांचा समावेश आहे. यामध्ये त्रिशूली-1 या जलविद्युत प्रकल्पात काम करणाऱ्या 73 भारतीय कर्मचाऱ्यांचा समावेश असून भारतीय दूतावास या प्रकल्पाच्या प्रमुखांच्या सतत संपर्कात आहे. याशिवाय, तामिळनाडूमधून प्रवास करणाऱ्या 37 आणि 49 पर्यटकांच्या दोन वेगवेगळ्या गटांशी संपर्क होऊ शकलेला नाही.

तसेच, पश्चिम बंगालमधील 32 जणांचा एक समूह रसुवा जिल्ह्यातील तिमुरे भागात अडकला असल्याची शक्यता वर्तवली जात आहे. याव्यतिरिक्त, केरळमधील 33 नागरिक आणि रिचा टूरद्वारे प्रवास करणारे इतर वेगवेगळ्या राज्यांतील 61 भारतीय नागरिक देखील बेपत्ता आहेत.

आपत्तीग्रस्तांपर्यंत पोहोचण्यासाठी काठमांडूमधील भारतीय दूतावास शर्थीचे प्रयत्न करत आहे. मात्र, महापुरामुळे वीज आणि टेलिफोन लाईन खंडित झाल्याने संपर्क यंत्रणा पूर्णपणे कोलमडली असून बचाव कार्यात मोठे अडथळे येत आहेत. दुसरीकडे, तिबेटच्या बाजूला असलेल्या प्रभावित भागातही परिस्थिती बिकट आहे. तिथे सुमारे 150 भारतीय नागरिक बेपत्ता असल्याची माहिती आहे, तर सुरक्षित असलेल्या आणखी 200 भारतीय नागरिकांनी भारतात परतण्यासाठी तातडीच्या मदतीची मागणी केली आहे.

सध्या मदत मागणाऱ्यांपैकी 95 भारतीय धारचेन येथे असून ते नेपाळ सीमेवरील हिल्सा भागाच्या दिशेने प्रवास करत आहेत. तसेच काही नागरिक जिलॉन्ग शहर आणि झुथुलफुक भागात अडकले आहेत. परराष्ट्र मंत्रालय, भारतीय दूतावास आणि चीन व नेपाळचे स्थानिक प्रशासन यांच्यात सातत्याने समन्वय साधला जात असून, सर्व भारतीयांना सुरक्षित बाहेर काढण्यासाठी युद्धपातळीवर प्रयत्न सुरु आहेत.