Nepal Electric Van Accident: नेपाळमध्ये गुरुवारी (12 नोव्हेंबर) सकाळी भीषण अपघात घडला. प्रवाशांनी भरलेली एक इलेक्ट्रिक व्हॅन अनियंत्रित होऊन तब्बल 500 मीटर खोल दरीत कोसळली. या दुर्दैवी अपघातात तीन मुलांसह एकूण 10 जणांचा जागीच मृत्यू झाला, तर 5 जण गंभीर जखमी झाले. स्थानिक प्रशासन आणि सुरक्षा यंत्रणांनी तातडीने घटनास्थळी धाव घेत बचावकार्य राबवले असून, सर्व जखमींना उपचारासाठी नजीकच्या रुग्णालयात दाखल करण्यात आले.

मिळालेल्या माहितीनुसार, हा अपघात (Accident) गुरुवारी सकाळी 5 वाजून 45 मिनिटांच्या सुमारास नेपाळच्या बागमती प्रांतातील मकवानपुर जिल्ह्यातील भीमफेदी गाउंपालिका-6 अंतर्गत येणाऱ्या चिसापानी गढीजवळ घडला. ही इलेक्ट्रिक व्हॅन राजधानी काठमांडू येथून सर्लाहीच्या दिशेने जात होती आणि या प्रवासात व्हॅनमध्ये सुमारे 15 प्रवासी होते. भीमफेदी-कुलेखानी-काठमांडू या खडकाळ व धोकादायक रस्त्यावर चालकाचे वाहनावरील नियंत्रण सुटल्यामुळे हा अपघात झाल्याचे प्राथमिक तपासात समोर आले. वाहन रस्ता सोडून थेट 500 मीटर खाली खोल दरीत कोसळल्याने वाहनाचा चक्काचूर झाला.

स्थानिक वृत्तसंस्थांनी दिलेल्या माहितीनुसार, मृतांमध्ये तीन महिला, दोन लहान मुली आणि पाच पुरुषांचा समावेश आहे. सशस्त्र दलाचे सहप्रवक्ता शैलेन्द्र थापा यांनी या अपघाताला दुजोरा दिला असून मृतांचा आकडा 10 असल्याचे स्पष्ट केले. दुर्घटना घडताच स्थानिक नागरिक आणि सुरक्षा दलांनी तातडीने मदतकार्य सुरु केले. सात सदस्यांचे विशेष बचाव पथक घटनास्थळी दाखल झाले, ज्यांनी दरीत कोसळलेल्या वाहनातून मृतदेह बाहेर काढले आणि जखमींना तातडीने उपचारासाठी रुग्णालयात हलवले. या भीषण दुर्घटनेमुळे परिसरात शोककळा पसरली असून, डोंगराळ भागातील प्रवासाच्या सुरक्षिततेचा प्रश्न पुन्हा एकदा ऐरणीवर आला. प्रशासनाकडून या संपूर्ण अपघाताची कसून चौकशी केली जात आहे.