North Korea: उत्तर कोरियाचा हुकूमशहा किम जोंग उन याने एक फर्मान जारी केला आहे, ज्यामुळे लोकांमध्ये विशेषतः महिलांमध्ये घबराट पसरली आहे. उत्तर कोरियातील अधिकारी किम जोंग उन यांच्या मुलीचे नाव असलेल्या मुली आणि महिलांना त्यांची ओळख बदलण्यास भाग पाडत आहेत.

फॉक्स न्यूजने आपल्या वृत्तात ही माहिती दिली आहे. उत्तर कोरियाचे सर्वोच्च नेते किम जोंग उन यांच्या मुलीचे नाव जू ए असे असून तिचे वय नऊ ते 10 वर्षे असल्याचे समजते.

दरम्यान, या ताज्या आदेशावरुन अनेक अर्थ काढले जात आहेत. किम जोंगला आपल्या मुलीला एक वेगळी ओळख द्यायची आहे, असे बोलले जात आहे. फॉक्सच्या बातम्या रेडिओ फ्री एशियाच्या अहवालावर आधारित आहेत, ज्यात उत्तर कोरियामधील (North Korea) दोन अज्ञात स्त्रोतांचा हवाला देण्यात आला आहे. यापैकी एक स्रोत उत्तर प्योंगयांगमध्ये राहतो आणि दुसरा दक्षिण प्योंगयांगमध्ये राहतो.

दुसरीकडे, जू ए नुकतीच उत्तर कोरियाच्या लष्करी परेडदरम्यान तिच्या वडिलांसोबत सार्वजनिकपणे दिसली होती. परेडच्या एक दिवस आधी, तिला लष्कराच्या (Army) बॅरेकमध्ये एका भव्य मेजवानीतही पाहिले गेले. किम जोंगची मुलगी गेल्या वर्षी नोव्हेंबरमध्ये पहिल्यांदा मीडिया आणि जगासमोर आली होती.