Iran Shopping Center Fire Video: इराणची राजधानी तेहरानच्या उपनगरातील एका शॉपिंग सेंटरमध्ये भीषण आग लागल्याची धक्कादायक घटना समोर आली. या भीषण अग्निकांडात 8 जणांचा मृत्यू झाला असून 36 जण जखमी झाले आहेत. इराणच्या सरकारी माध्यमाने बुधवारी (5 मे) या घटनेची अधिकृत माहिती दिली असून सर्व जखमींना तातडीने जवळच्या रुग्णालयात उपचारासाठी दाखल करण्यात आले, जिथे त्यांच्यावर सध्या उपचार सुरु आहेत. मंगळवारी ही आग तेहरान प्रांतातील अंडीशे शहरातील 'अरघवान शॉपिंग सेंटर'मध्ये लागली.

दरम्यान, या आगीचे (Fire) नेमके कारण अद्याप स्पष्ट होऊ शकलेले नाही. इराणचे राज्य दूरदर्शन 'आयआरआयबी'ने (IRIB) दिलेल्या माहितीनुसार, संबंधित अधिकाऱ्यांमार्फत या प्रकरणाची सखोल चौकशी करण्यात येत आहे. दुर्घटनेनंतर समोर आलेल्या फुटेजमध्ये या बहुमजली इमारतीतून काळ्या धुराचे लोट आकाशात उठताना दिसत आहेत, तर दुसरीकडे अग्निशमन दलाचे जवान या आगीवर नियंत्रण मिळवण्यासाठी शर्थीचे प्रयत्न करत आहेत.

विशेष म्हणजे, गेल्या तीन आठवड्यांपासून अमेरिकेसोबत एक नाजूक संघर्षविराम लागू आहे. अशा संवेदनशील काळात ही आगीची घटना घडल्याने सर्वत्र खळबळ उडाली; मात्र या आगीचा सध्या सुरु असलेल्या युद्धाशी किंवा संघर्षाशी कोणताही संबंध असल्याचे संकेत मिळालेले नाहीत. प्रशासन आता या घटनेमागील तांत्रिक कारणांचा किंवा मानवी त्रुटींचा शोध घेत आहे.