Yogyakarta Daycare Abuse Viral Video: इंडोनेशियातून एक धक्कादायक घटना समोर आली. योज्यकर्ता येथे एका नामांकित डेकेअर सेंटरमध्ये लहान मुलांचा अमानुष छळ होत असल्याचा संतापजनक प्रकार समोर आला. या घटनेचा धडकी भरवणारा व्हिडिओ सोशल मीडियावर व्हायरल झाल्यानंतर संपूर्ण देशात संतापाची लाट उसळली. त्यानंतर प्रशासनाने तातडीने कारवाई करत या सेंटरला कायमचे टाळे ठोकले. पोलिसांनी याप्रकरणी गुन्हेगारी तपास सुरु केला असून आतापर्यंत 13 संशयितांना अटक करण्यात आली.

मिळालेल्या माहितीनुसार, योज्यकर्ता येथील 'लिटल अरेषा' नावाच्या डेकेअर सेंटरमध्ये दोन वर्षांच्या चिमुकल्यांना क्रूर वागणूक दिली जात होती. व्हायरल झालेल्या या फुटेजमध्ये कर्मचाऱ्यांकडून मुलांवर होणारा अत्याचार स्पष्टपणे दिसत आहे. या प्रकाराची गंभीर दखल घेत पोलिसांनी 30 हून अधिक लोकांची चौकशी केली. योज्यकर्ता मेट्रो पोलीस प्रमुख इवा गुना पांडिया यांनी दिलेल्या माहितीनुसार, अटक करण्यात आलेल्यांमध्ये डेकेअर फाउंडेशनचा प्रमुख, व्यवस्थापक आणि 11 कर्मचाऱ्यांचा समावेश आहे. या सर्वांना तातडीने ताब्यात घेण्यात आले असून पुढील तपास वेगाने सुरु आहे.

तपासादरम्यान समोर आलेली माहिती अधिकच अस्वस्थ करणारी आहे. या डेकेअर सेंटरमध्ये एकूण 103 मुले नोंदणीकृत होती, ज्यापैकी 53 मुले या अत्याचाराचे बळी ठरल्याचा प्राथमिक अंदाज आहे. काही चिमुकल्यांना झोपताना त्यांचे हात-पाय बांधून ठेवले जात असल्याच्या तक्रारीही समोर आल्या. पोलिसांच्या प्रवक्त्यांनी सांगितले की, मुलांचे संरक्षण करणे ही आमची प्राथमिकता असून दोषींना कोणत्याही परिस्थितीत सोडले जाणार नाही. सध्या पीडित मुलांची वैद्यकीय तपासणी आणि मानसोपचार तज्ज्ञांमार्फत समुपदेशन केले जात आहे, जेणेकरुन या छळाची व्याप्ती पूर्णपणे स्पष्ट होईल.

जालन पाकेल येथील हे 'लिटल अरेषा' डेकेअर सेंटर आता कायमचे सील करण्यात आले. या घटनेमुळे खासगी बालसंगोपन केंद्रांच्या परवाना प्रक्रिया, कर्मचाऱ्यांची पार्श्वभूमी तपासणे आणि सीसीटीव्ही निरीक्षणाबाबत कडक कायदे करण्याची मागणी जोर धरत आहे. त्याचवेळी, इंडोनेशियातील पालक आणि बाल हक्क तज्ज्ञांनी अशा संस्थांवर सरकारच्या कडक देखरेखीची आणि कर्मचाऱ्यांसाठी कठोर प्रशिक्षणाची गरज व्यक्त केली. या प्रकरणामुळे केवळ योज्यकर्ताच नव्हे, तर संपूर्ण इंडोनेशियातील बालसुरक्षेच्या मानकांवर मोठे प्रश्नचिन्ह निर्माण झाले असून पीडित कुटुंबांना न्याय मिळवून देण्यासाठी पोलीस कसून तपास करत आहेत.