America: अमेरिकेत पदव्युत्तर शिक्षण घेणाऱ्या आंध्र प्रदेशातील 24 वर्षीय विद्यार्थ्याची गोळ्या झाडून हत्या करण्यात आली आहे. उदरनिर्वाहासाठी तो पेट्रोल पंपावर काम करत होता.

तो काम करत असलेल्या पेट्रोल पंपावर गोळीबार करण्यात आला, ज्यामध्ये त्याचा जागीच मृत्यू झाल्याची माहिती मिळत आहे.

गोळीबारात मृत्युमुखी पडलेल्या विद्यार्थ्याचे नाव सायेश वीरा असे आहे. तो आंध्र प्रदेशचा रहिवासी होता.

सायेश अमेरिकेतील ओहायो राज्यातील कोलंबस शहरातील पेट्रोल पंपावर उदरनिर्वाहासाठी काम करत होता. आता अमेरिकन पोलीस या प्रकरणाचा तपास करत आहेत.

दरम्यान, ही घटना गुरुवारी सकाळी 12.50 वाजता (यूएस स्थानिक वेळेनुसार) फ्रँकलिंटन, कोलंबस, ओहायो येथील वेस्ट ब्रॉड स्ट्रीट येथे घडली.

त्यावेळी सायेश पेट्रोल पंपवर काम करत होता. सायेश नोव्हेंबर 2021 मध्ये अमेरिकेत (America) आला होता. गुरुवारी दुपारी एका सशस्त्र हल्लेखोराने पेट्रोल पंपावर हल्ला करुन सायेशकडे पैशांची मागणी केली होती.

सायेशच्या काकाने सांगितले की, "त्याने या हल्लेखोरांचा प्रतिकार केला असता, हल्लेखोरांनी पैसे लुटण्यापूर्वी त्याच्यावर गोळ्या झाडल्या."

पोलिसांनी मारेकऱ्याचा फोटो जारी केला

स्थानिकांनी सांगितले की, सायेशला ताबडतोब रुग्णालयात (Hospital) नेण्यात आले, मात्र काही वेळाने त्याचा मृत्यू झाला. दरम्यान, कोलंबस पोलिसांनी संशयिताचा फोटो जारी केला आहे.

विशेष म्हणजे, त्यांनी हल्लेखोरासंबंधी माहिती शेअर करण्याचे आवाहन केले आहे. सध्या अमेरिकन पोलिसांनी गुन्हा दाखल करुन तपास सुरु केला आहे.

यासोबतच मृत सायेशच्या कुटुंबीयांना या घटनेची माहिती आधीच देण्यात आली आहे. सायेश वीराचे पार्थिव लवकरच त्याच्या गावी पाठवण्यात येणार असल्याचे सांगण्यात येत आहे.