Indian Government has suspended visa services in Canada for now:

भारत आणि कॅनडामधील संबंध सातत्याने बिघडत आहेत. कॅनडाचे पंतप्रधान जस्टिन ट्रूडो यांनी खलिस्तानी दहशतवादी हरदीपसिंग निज्जरच्या हत्येसाठी भारताला जबाबदार धरले होते. तेव्हापासून दोन्ही देशांमधील संबंधांमध्ये दरी सातत्याने वाढत आहे.

या प्रकरणात आता भारताने कॅनडामधील व्हिसा सेवा सध्या स्थगित केली आहे. आता कॅनडाच्या नागरिकांना भारतात यायचे असेल तर त्यांना व्हिसा मिळणार नाही.

कॅनडामधील इंडियन व्हिसा सर्व्हिसेसच्या पोर्टलवर एक सूचना प्रकाशित करण्यात आली आहे. भारतीय मिशन्सना संबोधित करताना असे सांगण्यात आले की, ऑपरेशनल कारणांमुळे पुढील आदेश येईपर्यंत भारतीय व्हिसा जारी करण्याची प्रक्रिया स्थगित करण्यात आली आहे.

उल्लेखनीय आहे की, एक दिवसापूर्वी, खलिस्तान समर्थक संघटना शिख फॉर जस्टिस (SFJ) च्या धमकीनंतर, भारतीय परराष्ट्र मंत्रालयाने कॅनडामध्ये राहणारे भारतीय आणि तेथे शिकत असलेल्या भारतीय विद्यार्थ्यांसाठी काही सूचना जारी केल्या होत्या.

याआधी कॅनडा सरकारने भारतात राहणाऱ्या नागरिकांसाठी अ‍ॅडव्हायजरी जारी केली होती. यानंतर भारतानेही बुधवारी कॅनडात राहणाऱ्या आपल्या नागरिकांसाठी अ‍ॅडव्हायजरी जारी केली. त्यामध्ये, कॅनडातील वाढत्या भारतविरोधी कारवाया, द्वेषपूर्ण गुन्हे आणि हिंसाचाराच्या पार्श्वभूमीवर तेथे राहणाऱ्या भारतीयांनी सावधगिरी बाळगावी, असे म्हटले आहे.

ज्या भागात यापूर्वी भारतविरोधी कारवाया झाल्या आहेत, त्या भागात जाणे त्यांनी टाळावे. सर्व भारतीयांनी, विशेषत: विद्यार्थ्यांनी, ओटावा येथील उच्चायुक्तालय आणि टोरंटो आणि व्हँकुव्हर येथील भारतीय वाणिज्य दूतावासात आपली नोंदणी करावी.

काही दिवसांपूर्वी कॅनडाचे पंतप्रधान जस्टिन ट्रुडो यांनी संसदेत भारताविषयी केलेल्या वक्तव्यानंतर हा संपूर्ण वाद सुरू झाला.

ट्रूडो यांनी खलिस्तानी दहशतवादी हरदीपसिंग निज्जरच्या हत्येप्रकरणी भारताच्या भूमिकेचा उल्लेख केला होता. कॅनडाने एका भारतीय राजनैतिकाला देश सोडण्यास सांगितले होते. यानंतर भारताने कॅनडाच्या एका मुत्सद्द्यालाही देश सोडण्यास सांगितले.