Imran Khan: पाकिस्तानचे माजी पंतप्रधान इम्रान खान यांनी त्यांच्यावर झालेल्या खुनी हल्ल्याबाबत मोठा खुलासा केला आहे. आपल्यावर हल्ला होणार असल्याच्या एक दिवस आधी आपल्याला याची माहिती मिळाल्याचे त्यांनी सांगितले. रुग्णालयामधून देशवासीयांना संबोधित करताना इम्रान खान म्हणाले की, 'माझ्यावर हल्ला होणार हे मला एक दिवस आधी कळले होते. माझ्या पायाला चार गोळ्या लागल्या आहेत.'

दरम्यान, गुरुवारी पंजाब (Punjab) प्रांतातील वजिराबाद येथे निषेध मोर्चा दरम्यान इम्रान खान यांच्यावर हल्ला झाला. या हल्ल्यात एकाचा मृत्यू झाला तर 10 जण जखमी झाले. आपल्या भाषणादरम्यान इम्रान म्हणाले की, "मी हल्ल्याचा तपशील नंतर देईन. पण मला हल्ल्याच्या एक दिवस आधी समजले की, त्यांनी मला वजिराबादमध्ये ठार मारण्याची योजना आखली होती."

दुसरीकडे, पीटीआयचे प्रमुख इम्रान खान (Imran Khan) यांनी आपल्या भाषणात पीएमएल-एन आणि पीपीपीवर निशाणा साधला. दोन्ही पक्षांनी मोठ्या प्रमाणावर भ्रष्टाचार (Corruption) करुन देशाचे कर्ज वाढवले, असे ते म्हणाले. एनआरओच्या माध्यमातून दोन्ही पक्षांच्या नेत्यांना दिलासा देण्यात आल्याचेही त्यांनी सांगितले.