Sri Lanka crisis: गंभीर आर्थिक संकटाच्या काळात श्रीलंकेतून यावेळी मोठी बातमी समोर येत आहे . राष्ट्रपती गोटाबाया राजपक्षे (President Gotabaya Rajapaksa) यांनी देशातील आणीबाणीचा निर्णय मागे घेतल्याचे सांगण्यात येत आहे. देशात सुरू असलेल्या हिंसक आंदोलनाच्या पार्श्वभूमीवर आणीबाणी लागू करण्यात आली होती. याआधी सोमवारी पंतप्रधान महिंदा राजपक्षे यांच्या घरासमोर लोकांनी जोरदार निदर्शने केली. जमावाला नियंत्रणात आणण्यासाठी अश्रुधुराच्या नळकांड्यांचाही वापर करण्यात आला. संपूर्ण कोलंबो शहर आंदोलकांनी व्यापले होते. कोलंबोमध्ये लाईटही बंद झाली होती, संपूर्ण शहर अंधारात होते. त्यामुळे देशात आणीबाणी लागू करण्यात आली.

विदेशी कर्जाच्या सापळ्यामध्ये फसलेल्या श्रीलंकेला इतिहासातील सर्वात वाईट आर्थिक संकटाचा सामना करावा लागत आहे. त्यामुळे नागरिकांना तासनतास वीजपुरवठा खंडित होऊन जीवनावश्यक वस्तूंचा तुटवडाही भासत आहे. इंधन, स्वयंपाकाचा गॅस, जीवनावश्यक वस्तूंचा तुटवडा पुरवठा आणि तासनतास वीज खंडित होण्यामुळे नागरिक त्रस्त झाले आहेत. श्रीलंकेचा सध्याचा परकीय चलन निधी केवळ 20 अब्ज डॉलर्स इतका कमी झाला आहे.

राजपक्षे यांची सत्तेवरील पकड कमकुवत झाली

मंगळवारी राष्ट्रपती गोटाबाया राजपक्षे यांच्या नेतृत्वाखालील श्रीलंकेच्या सत्ताधारी आघाडीसाठी अडचणी वाढल्या जेव्हा नवनियुक्त अर्थमंत्री अली साबरी यांनी राजीनामा दिला,तेव्हा खासदारांनीही सत्ताधारी आघाडी सोडली. दुसरीकडे, देशाच्या भीषण आर्थिक संकटाच्या काळात देशव्यापी निषेधाची प्रक्रियाही सुरू आहे. साबरी यांची नियुक्ती राष्ट्रपती राजपक्षे यांनी त्यांचे भाऊ बासिल राजपक्षे यांची हकालपट्टी केल्यानंतर केली होती. बासिल हे सत्ताधारी श्रीलंका पोदुजाना पेरामुना (SLPP) युतीमध्ये नाराजीचे मुख्य स्त्रोत होते. राष्ट्रपतींना लिहिलेल्या पत्रात साबरी यांनी तात्पुरता उपाय म्हणून हे पद स्वीकारल्याचे सांगितले.

महिंदा राजपक्षे यांचे सरकार अल्पमतात

पंतप्रधान महिंदा राजपक्षे यांचे सरकार अल्पमतात आले आहे. श्रीलंकेतील राजपक्षे यांचे सरकार लवकरच पडेल, असे मानले जात आहे. कारण सत्ताधारी पक्षांतील असंतुष्टांची संख्या 41 वर गेली असून ती वाढण्याची शक्यता आहे. सत्ताधारी श्रीलंका पोदुजाना पेरामुना पार्टी (SLPP) चे 225 सदस्य असलेल्या श्रीलंकेच्या संसदेत 117 खासदार आहेत तर त्यांच्या मित्रपक्ष SLFP चे 15 सदस्य आहेत. या आघाडीत 10 पक्षांचे इतर 14 खासदार आहेत. त्याचवेळी विरोधी पक्ष SJB चे 54 सदस्य आहेत. याशिवाय TNA मध्ये 10 सदस्य आहेत आणि इतर 15 सदस्य आहेत. सत्ताधारी पक्षात फूट पडल्यानंतर एसएलपीपीकडे आता केवळ 105 सदस्य उरले आहेत. सत्ताधारी पक्षांतील असंतुष्टांची संख्या 41 वर गेली असून ती वाढण्याची शक्यता आहे.

श्रीलंका नॉर्वे आणि इराकमधील दूतावास बंद करणार आहे

रोखीने अडचणीत असलेल्या श्रीलंकेने नॉर्वे आणि इराकमधील दूतावास तसेच सिडनी येथील देशाचे वाणिज्य दूतावास तात्पुरते बंद करण्याचा निर्णय घेतला आहे. परराष्ट्र मंत्रालयाने मंगळवारी ही माहिती दिली. हा निर्णय ३० एप्रिलपासून लागू होईल, असे मंत्रालयाने दिलेल्या निवेदनात म्हटले आहे. मंत्रालयाने म्हटले आहे की सरकारचे दोन दूतावास आणि एक वाणिज्य दूतावास तात्पुरते बंद करण्याचा निर्णय काळजीपूर्वक विचारमंथनानंतर घेण्यात आला आहे आणि हा श्रीलंकेच्या परदेशातील राजनैतिक प्रतिनिधित्वाच्या सामान्य पुनर्रचनेचा एक भाग आहे. परराष्ट्र मंत्रालयाने सांगितले की, सिडनी येथील वाणिज्य दूतावासाचे कार्यक्षेत्र ऑस्ट्रेलियातील कॅनबेरा येथील श्रीलंकेच्या उच्चायुक्तालयाकडे परत जाईल. बिघडलेल्या आर्थिक परिस्थितीमुळे देशभरात निदर्शने झाली आणि श्रीलंकेच्या मंत्रिमंडळाने सामूहिक राजीनामा दिला.