Colombia Plane Crash : कोलंबियाच्या दुर्गम ॲमेझॉन वर्षावनांमध्ये सोमवारी एक भीषण विमान अपघात झाला. 'लॉकहीड मार्टिन हर्क्युलिस C-130' या लष्करी विमानाला झालेल्या अपघातात आतापर्यंत ६६ जवानांना आपले प्राण गमवावे लागले आहेत. या विमानात एकूण ११० जवान प्रवास करत होते. पेरू देशाच्या सीमेजवळील पुएर्तो लेगुझामो शहराजवळ ही हृदयद्रावक घटना घडली असून, संपूर्ण कोलंबिया देश या धक्क्याने हादरला आहे.

तांत्रिक बिघाडामुळे भीषण दुर्घटना

मिळालेल्या प्राथमिक माहितीनुसार, विमानाने उड्डाण केल्यानंतर अवघ्या काही वेळातच त्यात तांत्रिक बिघाड झाला आणि ते थेट जमिनीवर कोसळले. अपघातानंतर विमानाला भीषण आग लागली, ज्याचा धूर अनेक मैलांवरून दिसत होता. सुदैवाने, बचाव पथकाने ढिगाऱ्याखालून ५० हून अधिक जवानांना सुरक्षित बाहेर काढले आहे. जखमींना तातडीने जवळच्या लष्करी रुग्णालयात दाखल करण्यात आले असून त्यांच्यावर उपचार सुरू आहेत.

बचावकार्यात आव्हान

हा अपघात निवासी क्षेत्रापासून अवघ्या ३ किलोमीटर अंतरावर झाला, ज्यामुळे मोठी नागरी हानी टळली. मात्र, दाट जंगल आणि प्रतिकूल हवामानामुळे मदतकार्यात अनेक अडथळे येत आहेत. स्थानिक मीडिया 'ब्लूराडियो'च्या वृत्तानुसार, अद्यापही शोधमोहीम सुरू आहे. शहीद झालेले बहुतेक जवान तरुण होते, जे त्यांच्या कर्तव्यावर जात असताना काळाने त्यांच्यावर घाला घातला.

राष्ट्राध्यक्ष गुस्तावो पेट्रो यांचा संताप

या दुर्घटनेनंतर कोलंबियाचे राष्ट्राध्यक्ष गुस्तावो पेट्रो यांनी तीव्र संताप व्यक्त केला आहे. त्यांनी सोशल मीडियाच्या माध्यमातून प्रशासकीय अधिकाऱ्यांवर ताशेरे ओढले. "हा अपघात म्हणजे लष्करी ताफ्याच्या आधुनिकीकरणातील दिरंगाईचा परिणाम आहे," असे त्यांनी स्पष्टपणे म्हटले आहे. पेट्रो यांनी इशारा दिला की, जर अधिकारी ताफ्याचे नूतनीकरण करण्यात अक्षम असतील, तर त्यांनी आपल्या पदाचा राजीनामा द्यावा. आपल्या देशातील तरुणांचे आयुष्य अशा प्रकारे धोक्यात घालणे आता खपवून घेतले जाणार नाही, असा सज्जड दमही त्यांनी दिला.

जुनाट विमाने आणि सुरक्षेचा प्रश्न

हर्क्युलिस C-130 हे विमान १९६० च्या दशकापासून कोलंबियाच्या ताफ्यात आहे. अनेक देशांनी ही विमाने सेवानिवृत्त केली असताना, कोलंबियात आजही त्यांचा वापर सुरू आहे. ॲमेझॉनसारख्या दुर्गम आणि आव्हानात्मक भागात अशा जुन्या विमानांनी उड्डाण करणे म्हणजे मृत्यूला आमंत्रण देण्यासारखे असल्याचे तज्ज्ञांचे मत आहे. संरक्षण मंत्रालयाने आता या प्रकरणाच्या उच्चस्तरीय चौकशीचे आदेश दिले असून, जुनाट यंत्रणा की मानवी चूक, याचा तपास केला जाणार आहे.