श्रीलंकेतील परिस्थिती बिकट होत चालली आहे. कर्फ्यू लागू केल्यानंतर आता तेथील सरकारने सोशल मीडिया प्लॅटफॉर्मवर बंदी घातली आहे. रविवारपासून, श्रीलंकेत फेसबुक, ट्विटर, व्हॉट्सअ‍ॅप आणि इन्स्टाग्राम यासह सर्व सोशल मीडिया प्लॅटफॉर्म बंद करण्यात आले आहेत. (ban on social media applications in sri lanka)

शनिवारी रात्री उशिरापासून कोलंबोसह अनेक शहरांमध्ये सोशल मीडिया (Social Media) प्लॅटफॉर्मने काम करणे बंद केले. आज देशभर सुरू असलेली निदर्शने रोखण्यासाठी सरकारने हे पाऊल उचलल्याचे मानले जात आहे. श्रीलंकेत लागू करण्यात आलेल्या कर्फ्यू दरम्यान, अत्यावश्यक सेवांसाठी काम करणाऱ्या लोकांना ओळखपत्राद्वारे फिरण्याची परवानगी देण्यात आली आहे. यापूर्वी शनिवारी श्रीलंकेत कर्फ्यूचा आदेश जारी करण्यात आला होता. येथे शनिवारी सायंकाळी 6 ते सोमवारी सकाळी 6 वाजेपर्यंत सार्वजनिक हालचालींवर बंदी घालण्यात आली आहे.

कर्फ्यू दरम्यान, लोकांना रस्ते, उद्याने, रेल्वे (Railway), समुद्रकिनारे यासह सर्व सार्वजनिक ठिकाणी जाण्यास बंदी घालण्यात आली आहे. श्रीलंका सरकारच्या म्हणण्यानुसार, निदर्शनांमध्ये आतापर्यंत 3 कोटी 90 लाख रुपयांच्या सरकारी मालमत्तेचे नुकसान झाले आहे. सरकारच्या म्हणण्यानुसार, मिर्हान भागात राष्ट्रपती निवासस्थानाजवळ झालेल्या आंदोलनादरम्यान आतापर्यंत 17 पोलीस अधिकारी गंभीर जखमी झाले आहेत.

श्रीलंकेच्या (Sri Lanka) आर्थिक दुर्दशेचा अंदाज यावरून लावला जाऊ शकतो की कोलंबोमध्ये 13-13 तास वीजपुरवठा खंडित झाल्याने लोक रस्त्यावर उतरले आहेत आणि राष्ट्रपतींच्या राजीनाम्याची मागणी करत आहेत. लोकांना खाण्यापिण्याची सोय नाही. लोक हिंसक निदर्शने करत आहेत. परिस्थिती इतकी बिघडली आहे की राष्ट्रपती गोटाबाया राजपक्षे यांनी 1 एप्रिलपासून देशात आणीबाणी लागू केली आहे. श्रीलंकेच्या राष्ट्रपतींच्या कार्यालयातून जारी करण्यात आलेल्या आदेशात देशात कायदा आणि सुव्यवस्था राखण्यासाठी, जीवनावश्यक वस्तूंचा पुरवठा सुरू ठेवण्यासाठी हे करणे आवश्यक असल्याचे म्हटले आहे.