पाकिस्तानातील क्वेटाजवळ झालेल्या एका प्राणघातक हल्ल्यात बलुच लिबरेशन आर्मी (BLA ) ने रिमोट-कंट्रोल्ड इम्प्रोव्हाइज्ड एक्सप्लोझिव्ह डिव्हाइस (IED) वापरून पाकिस्तानी लष्कराच्या ताफ्यावर बॉम्बस्फोट केल्याची जबाबदारी स्वीकारली आहे.

बीएलएच्या अधिकृत निवेदनानुसार हा हल्ला मार्गट परिसरात झालेला आहे, जिथे झालेल्या या स्फोटामध्ये पाकिस्तानी सैन्याचे वाहन नष्ट झाले आहे आणि सोबतच दहा सैनिकांचा मृत्यू झाला आहे.

बीएलएचे प्रवक्ते जियंद बलूच यांनी पत्रकार परिषदेमध्ये या हल्ल्याबाबत माहिती दिली. ज्यामध्ये त्यांनी सांगितले की हे ऑपरेशन या प्रदेशावर कब्जा करू पाहणाऱ्या सैन्याच्या तुकडीविरुद्ध होते आणि ते यशस्वी झालेले आहे. या गटाने या हल्ल्याला होणाऱ्या आक्रमणांविरुद्धच्या प्रतिकार प्रयत्नांचा एक भाग असल्याचे स्पष्ट केले आहे.

गेल्या महिन्यात याच फुटीरतावादी गटाशी संबंधित एका हाय-प्रोफाइल घटनेनंतर हा हल्ला झाल्याची माहिती देण्यात आली. त्या घटनेमध्ये, बीएलएच्या गटाने बोलानमध्ये जाफर एक्सप्रेसचे अपहरण केले होते आणि ३३९ प्रवाशांना ओलीस ठेवले होते.

क्वेटाहून पेशावरला जाणाऱ्या रेल्वे रुळावर स्फोटकांचा स्फोट झाला, ज्यामुळे एका बोगद्यानजीक अनेक डबे आणि इंजिन रुळावरून घसरले. या घटनेमध्ये जवळपास २५ लोकांचा मृत्यू झाला होता.

अधिकाऱ्यांनी आयईडी हल्ल्याबाबत अद्याप अधिकृत निवेदन जारी केलेले नाही. याबाबत तपास सुरु आहे अशी माहिती देण्यात आलेली आहे.