USA: अवैध पद्धतीने सीमा ओलांडल्याबद्दल ऑक्टोबर 2022 ते सप्टेंबर 2023 दरम्यान अमेरिकेत 96,917 भारतीयांना अटक करण्यात आली आहे. अमेरिकेच्या सीमाशुल्क आणि सीमा संरक्षण (UCBP) विभागाच्या ताज्या आकडेवारीतून ही माहिती समोर आली आहे.

बेकायदेशीरपणे अमेरिकेची सीमा ओलांडून पकडलेल्या भारतीयांची संख्या मागील वर्षांच्या तुलनेत पाच पटीने वाढली आहे. आकडेवारीनुसार, 2019-20 मध्ये 19,883 भारतीय पकडले गेले. 2020-21 मध्ये 30,662 भारतीयांना अटक करण्यात आली होती, तर 2021-22 मध्ये ही संख्या 63,927 होती.

ऑक्टोबर 2022 ते या वर्षी सप्टेंबरपर्यंत अटक करण्यात आलेल्या 96,917 भारतीयांपैकी 30,010 कॅनडाच्या सीमेवर आणि 41,770 मेक्सिकोच्या सीमेवर पकडले गेले.

आर्थिक वर्ष 2023 मध्ये 84,000 भारतीय प्रौढ बेकायदेशीरपणे अमेरिकेत आले. अटक करण्यात आलेल्यांमध्ये 730 अल्पवयीन मुलांचाही समावेश आहे.

अमेरिकन सरकारचे आर्थिक वर्ष 1 ऑक्टोबर ते 30 सप्टेंबर पर्यंत चालते. दरम्यान, फ्रान्ससारख्या देशातून मेक्सिकोला जाण्यासाठी काही लोक उड्डाणे करतात. त्यानंतर टोळ्यांच्या मदतीने ते सीमेवर जाण्यासाठी बसमध्ये चढतात, असे सिनेटर जेम्स लँकफोर्ड यांनी गुरुवारी सिनेटमध्ये सांगितले.

या वर्षात आतापर्यंत आम्हाला भारतातील 45,000 लोक सापडले आहेत ज्यांनी दक्षिण सीमा ओलांडली आहे. त्यांना आपल्या देशात भीती वाटते. लँकफोर्ड यांनी सिनेटमध्ये सांगितले की हे लोक मेक्सिकोला जाण्यासाठी फ्रान्ससारख्या देशातून अनेक वेळा जहाजांची मदत घेतात. मग काही तथाकथित दलालांच्या मदतीने ते सीमेवर जाण्यासाठी बसमध्ये चढतात. संबंधित एजंट त्यांच्यासाठी बसेसची व्यवस्थाही करतात, अशी माहिती यूएस सिनेटर लँकफोर्ड यांनी एका स्थानिक वृत्तपत्राला दिली आहे.