Ganesh Chaturthi: गोमंतकीयांचा सर्वांत आवडता व मोठा सण असलेल्‍या गणेश चतुर्थीला आता अवघे तीनच दिवस राहिल्‍याने डिचोली व परिसरातील चित्रशाळांमधून गणपतीच्या मूर्ती रंगविण्याच्या कामाला वेग आला आहे. सर्व चित्रशाळांमधून रात्री जागू लागल्या आहेत. मये, कारापूर येथील काही चित्रशाळांमध्‍ये तर पुरुष कलाकारांसह महिलाही रंगकाम करताना दिसून येत आहेत.

बालगोपाळांचा आनंद द्विगुणित करणारा आणि हिंदूंचा मोठा सण असलेला गणेश चतुर्थी उत्‍सव येत्या बुधवारी 31 ऑगस्‍टपासून सुरू होत आहे. डिचोली तालुक्यात शंभरहून अधिक चित्रशाळा आहेत. मये गावात सर्वाधिक चित्रशाळा आहेत. बहुतेक चित्रशाळांमधून रंगकाम करून गणपतीच्या मूर्ती तयार झाल्या आहेत. कोविडमुळे गेल्या दोन वर्षात मूर्तीच्या आकारावर मर्यादा आली होती. यंदा मात्र चित्रशाळांमधून मध्यम आकारासह मोठ्या मूर्ती दिसून येत आहेत.

कारागिरांची कमतरता जाणवत असल्‍यामुळे डिचोली तालुक्यातील विविध चित्रशाळांमधून मूर्तिकारांबरोबरच त्‍यांची बायको-मुलेही रंगकामात मदत करताना दिसून येत आहेत. 75 वर्षांहून अधिक वर्षांची परंपरा असलेल्या कारापूर येथील सज्जन गावकर यांच्या चित्रशाळेत त्यांच्या पत्नी आणि मुलांसह फाईन आर्ट (Fine Art) केलेली त्यांची पुतणी आशना गावकर ही युवतीही गणपतीच्या मूर्तीना रंग देण्याचे काम करीत आहे. आपल्‍या चित्रशाळेतील मूर्तीना डिचोली तालुक्याबरोबरच बाहेरूनही मोठी मागणी असते. यंदा चित्रशाळेत सुमारे साडेतीनशे मूर्ती तयार करण्‍यात आल्‍या आहेत, असे सज्जन गावकर यांनी सांगितले.