Rahul Gandhi: आजी इंदिरा गांधी आणि आई सोनिया गांधी यांच्यासारखे गुण असलेली मुलगी मला लग्नासाठी हवी आहे, असे काँग्रेसचे माजी अध्यक्ष राहुल गांधी यांनी म्हटले आहे. एका ट्यूब चॅनलला दिलेल्या मुलाखतीत त्यांनी ही प्रतिक्रिया दिली. आजीसोबतच्या नात्याबद्दल विचारले असता राहुल गांधी म्हणाले की, “त्यांचे स्थान माझ्या आयुष्यात अनमोल आहे. त्या माझी दुसरी आई होत्या."

दरम्यान, इंदिरा गांधींसारखे (Indira Gandhi) गुण असलेल्या कोणाशी लग्न करायचे आहे का, असे विचारले असता राहुल म्हणाले की, "हा एक मनोरंजक प्रश्न आहे. मला अशी मुलगी हवी आहे, जिच्यात माझ्या आजी आणि आईसारखे गुण असावेत."

तसेच, ते पुढे असेही म्हणाले की, 'कोणी मला 'पप्पू' म्हटले तर वाईट वाटत नाही, कारण हा सर्व प्रचाराचा भाग आहे आणि जे असे बोलतात ते त्यात आहेत.'

राहुल गांधी (Rahul Gandhi) पुढे म्हणाले की, “मी कोणाचाही द्वेष करत नाही. ते मला शिवीगाळ करतात... परंतु मी त्यांचा तिरस्कार करणार नाही.'' या मुलाखतीत त्यांनी वाहने आणि दुचाकींबद्दलही सविस्तर चर्चा केली आणि सांगितले की, 'आपल्याकडे स्वतःची अशी कोणतीही कार नाही, परंतु आईकडे एक गाडी आहे.' राहुल पुढे असेही म्हणाले की, "मी जेव्हा लंडनमध्ये राहायचो, तेव्हा मी 'RS 20' बाइक चालवत असे."

शेवटी, राहुल गांधी म्हणाले की, 'मला सायकलिंग आवडते आणि एकेकाळी लॅम्ब्रेटा (स्कूटर) आवडायचे. दुसरीकडे, आवश्यक पायाभूत सुविधा उपलब्ध नसल्यामुळे भारत इलेक्ट्रिक वाहने आणि ड्रोनमध्ये अजूनही मागे आहे.'