Paragliding in Kerala: केरळमध्ये पॅराग्लायडिंगदरम्यान होणारा एक अपघात टळला आहे. तिरुअनंतपुरममधील वर्कला या पर्यटनस्थळी पापनाशम या बीचवर पॅराग्लायडिंग करताना एक 28 वर्षीय महिला आणि तिचा 50 वर्षीय पुरुष ट्रेनर असे दोघेही विद्युत खांबामध्ये अडकून बसले.

तब्बल दोन तासांच्या प्रयत्नांनंतर या दोघांची सुटका करण्यात आली. त्यांना सध्या रुग्णालयात दाखल करण्यात आले आहे. त्यांची प्रकृती उत्तम आहे.

या घटनेचा व्हिडिओ सोशल मीडियावर व्हायरल झाला आहे. ही घटना मंगळवारची आहे. दोघेही पॅराग्लायडिंग करत असल्याचे दिसून येते. जमिनीवर उतरताना त्यांचे पॅराशूट विजेच्या खांबात अडकले.

खांबाच्या वर अनेक हाय-व्होल्टेज दिवे आहेत आणि दोन्ही पॅराग्लायडर 50 फुटांपेक्षा जास्त उंचीच्या या खांबावर लटकले.

दोन तास हे दोघेही या खांबावर लटकलेल्या अवस्थेत होते. दोघांना वाचवण्यासाठी अग्निशमन दल घटनास्थळी पोहोचले, परंतु अग्निशमन विभागाकडे त्यांच्यापर्यंत पोहोचण्यासाठी इतकी लांब शिडी नव्हती. यामुळेच दोघांनाही सुमारे दोन तास खांबाला लटकत राहावे लागले.

खबरदारीचा उपाय म्हणून पोलिसांनी खांबाखाली गाद्या आणि जाळी ठेवली होती. अनेक प्रयत्नांनंतर महिला आणि पॅराग्लायडिंग ट्रेनरची सुटका करण्यात आली. दोघांना वर्कला येथील रुग्णालयात दाखल करण्यात आले असून त्यांची प्रकृती ठिक आहे.

दरम्यान, पॅराग्लायडिंगदरम्यान अपघात होण्याची ही पहिलीच वेळ नाही. गेल्या वर्षी गुजरातमधील मेहसाणा जिल्ह्यात पॅराग्लायडिंग करताना पडून दक्षिण कोरियातील एका 50 वर्षीय व्यक्तीचा मृत्यू झाला होता.

त्याचवेळी हिमाचल प्रदेशातील कुल्लू जिल्ह्यातील डोभी भागात पॅराग्लायडिंग करताना महाराष्ट्रातील 30 वर्षीय पर्यटकाचा मृत्यू झाला होता.