कर्नाटकमधील भाजपचे बडे नेते बी.एस. येडीयुरप्पा (B.S. Yeddyurappa) यांनी अखेर मुख्यमंत्री पदाचा राजीनामा दिला. कर्नाटकचे राज्यपाल थालरचंद गेहलोत (Thalarchand Gehlot) यांच्याकडे आपला मुख्यमंत्री पदाचा राजीनामा येडीयुरप्पा यांनी सोपवला. त्यानंतर येडीयुरप्पा यांच्याकडे कोणती मोठी जबाबदारी सोपविण्यात येणार याकडे सगळ्याचं लक्ष लागून राहीले असतानाच यासंबंधीचा त्यांनी स्वत:च खुलासा केला आहे. यापुढे फक्त आपण राज्याच्या कल्याणार्थ काम करणार आहोत, असे ते म्हणाले. मात्र कर्नाटकातील राजकिय समीकरणावर महाराष्ट्रातील कॉंग्रेस आमदाराने सोशल मिडियावरील ट्विटरवरुन एक खोचक ट्विट केले आहे. या ट्विटमधून कॉंग्रेस आमदार कुणाल पाटील (Kunal Patil) यांनी महाराष्ट्राचे माजी मुख्यमंत्री देवेंद्र फडणवीस यांच्यावर निशाणा साधला आहे.

महाराष्ट्राचे माजी मुख्यमंत्री आणि आताचे विरोधी पक्षनेते देवेंद्र फडणवीस यांनी 2019 च्या विधानसभा निवडणूकीदरम्यान प्रचारसभेतील भाषणात मी पुन्हा येईन हा राग आवळला होता. तसेच राज्याचे पुन्हा एकदा आपणच मुख्यमंत्री होणार हा कोरडा आशावादही त्यांनी व्यक्त केला होता. मात्र महाराष्ट्रात अखेर शिवसेना, राष्ट्रवादी कॉंग्रेस आणि कॉंग्रेस यांच्या महाविकास आघाडीचे सरकार स्थापन झाले. दरम्यान प्रचारसभेत फडणवीस यांचे मी पुन्हा येईन हे वाक्य राज्यभर चांगलंच गाजलं होतं.

या वाक्यावरुन सोशल मिडियार प्रचंड प्रमाणात ट्रोलही करण्यात आले होते. यातच आता धुळे ग्रामीण भागाचे सध्याचे आमदार कुणाल पाटील यांनी हाच धागा पकडत कर्नाटकच्या राजकिय घडामोडीवर भाष्य करत फडणवीस टीकेच्या माध्यमातून कोपरखळी मारली आहे. पाटील यांनी मी पुन्हा येईनला... कन्नड भाषेत नेमकं काय म्हणतात.. असा सवाल उपस्थित केला आहे. या प्रश्नावर काहींकडून उत्तरही देण्यात आली आहेत... तर दुसरीकडे काहींनी कन्नड भाषेतच उत्तर देणं पसंत केले आहे.

दरम्यान, येडीयुरप्पा म्हणाले, मी स्वता:चं राज्य सोडून कुठेही जाणार नाही. राज्याच्या कल्याणासाठी काम करणार आहे. मात्र आपण मुख्यमंत्री पदाचा राजीनामा कोणाच्याही दबावाखाली राहून दिला नसल्याचे त्यांनी सांगितले आहे.