काँग्रेस नेते राहुल गांधी यांच्या नेतृत्वाखाली भारत जोडो यात्रा सध्या राजस्थानमध्ये सुरू आहे. यावेळी तिथे उपस्थित लोकांनी ‘मोदी, मोदी’च्या घोषणा द्यायला सुरुवात केली. यावेळी राहुल गांधींनी जे केले त्याची सध्या सर्वत्र चर्चा सुरू आहे. जे लोक ‘मोदी, मोदी’ अशी घोषणाबाजी करत होते त्यांच्याकडे पाहून राहुल गांधींनी फ्लाइंग किस दिले. यावेळचा व्हिडिओ सोशल मिडियावर आता तुफान व्हायरल होत आहे. त्यांच्या या ‘फ्लाइंग किस’ने गर्दीला चकित केले. (Rahul Gandhi Viral Video)

राहुल गांधी यांनी मंगळवारी सकाळी आपल्या यात्रेला सुरुवात केली आणि मोर्चाची झलक पाहण्यासाठी भाजपच्या झालवार कार्यालयाच्या छतावर जमलेल्या लोकांना त्यांनी फ्लाइंग किस दिले. सोमवारी (5 डिसेंबर) रात्री गांधी थांबलेल्या खेल संकुल येथून यात्रा पुन्हा सुरू झाली आणि सकाळी झालवारमधून पुढे गेली. या व्हिडिओने नेटिझन्समध्ये दोन गट पडले असून या घटनेवर संमिश्र प्रतिक्रिया व्यक्त होत आहेत.

'रोहिणी आनंद' या युजरनेमने हा व्हिडिओ ट्विटरवर शेअर करण्यात आला आहे. "@RahulGandhi "मोदी! मोदी! घोषणाबाजी करण्याऱ्या लोकांना फ्लाइंग किस देत आहेत. लोक "राहुल गांधी" असे ओरडले तर मोदीही तशीच प्रतिक्रिया देतील का ??" असे कॅप्शन व्हिडिओखाली देण्यात आले आहे.

इथे व्हिडिओ पाहा :

सुमारे 12 किमी अंतर कापल्यानंतर ही यात्रा सकाळी 10 वाजता देवरीघाटावर पोहोचणार आहे. दुपारच्या जेवणानंतर ती सुकेत येथून दुपारी साडेतीन वाजता पुन्हा सुरू होईल. येथील मोरू कलान खेल मैदानावर रात्री मुक्कामाचे नियोजन करण्यात आले आहे.