BJP leader Kailash Vijayvargiya: बिहारमध्ये भाजपपासून फारकत घेऊन नितीश कुमार यांनी राजद नेते तेजस्वी यादव यांच्यासमेवत नवे सरकार स्थापन केले आहे. सरकार स्थापनेवरुन आता भाजप नेते कैलाश विजयवर्गीय यांनी नितीश कुमार यांची खिल्ली उडवली आहे. बिहारमध्ये नवे सरकार स्थापन होत होते तेव्हा आपण परदेशात असल्याचे त्यांनी सांगितले. परदेशात असताना मला एकाने सांगितले की, 'इथे मुली पटकन बॉयफ्रेंड बदलतात. बिहारमध्ये नितीशकुमारांचीही तीच स्थिती आहे.'

दरम्यान, बिहारमध्ये नितीशकुमार यांनी आठव्यांदा मुख्यमंत्रीपदाची शपथ घेऊन आठ दिवस उलटले आहेत, मात्र भाजप (BJP) नेत्यांकडून नितीशकुमार यांच्यावर हल्लाबोल सुरुच आहे. नितीश कुमार यांनी भाजपसोबतची साथ सोडून तेजस्वी यादव (Tejashwi Yadav) यांच्या राजद आणि काँग्रेससोबत बिहारमध्ये नवे सरकार स्थापन केले. दुसरीकडे, बिहारमध्ये पुन्हा एकदा जंगलराजचा दावा करणाऱ्या विजयवर्गीय यांनी नितीशकुमार (Nitish Kumar) यांच्यावर मोठे वक्तव्य केले आहे. त्यांच्या वक्तव्यावरुन आता बिहारच्या राजकारणात भूकंप आला आहे.

न्यूज एजन्सी एएनआयनुसार, विजयवर्गीय म्हणाले, "ज्या दिवशी बिहारमध्ये सत्तापालट झाला, त्या दिवशी मी परदेशात होतो, त्यावेळी मला एकाने सांगितले की, आमच्या बाबतीत असेच होते, मुली केव्हाही बॉयफ्रेंड बदलतात. बिहारमध्ये (Bihar) नितीशकुमारांचीही तीच स्थिती आहे.''