Bihar : बिहारमधील भागलपूरमध्ये बांधकाम सुरू असलेला पूल कोसळला आहे. या अपघाताचा व्हिडीओ समोर आला असून त्यात काही सेकंदात पूल नदीत बुडाला. याआधीही याठिकाणी पूल तुटला होता, म्हणजेच तो पुन्हा बांधला जात असल्याचे सांगण्यात येत आहे. मात्र आता पुन्हा एकदा पूल तुटून नदीत बुडाला आहे.

मुख्यमंत्री नितीश कुमार यांनी 2014 साली पुलाची पायाभरणी केली होती. 1700 कोटी रुपयांचा खर्च करून खगरियाच्या अगुवानी-सुलतानगंज दरम्यान गंगा नदीवर हा पूल बांधण्यात येत होता. रविवारी सायंकाळी सातच्या सुमारास हा पूल अचानक कोसळला.

या घटनेचा एक व्हिडिओ सोशल मीडियावर व्हायरल झाला आहे. त्या व्हिडिओमध्ये आधी पुलाचा काही भाग तुटतो आणि नंतर काही वेळातच संपूर्ण पूल नदीत बुडतो. घटनास्थळी उपस्थित अनेकांनी हा संपूर्ण प्रकार आपल्या फोनमध्ये कैद केला. सुदैवाने या अपघातात कोणीही जखमी झाले नाही. या दुर्घटनेवरुन विरोधकांनी सरकारवर भ्रष्टाचाराचे आरोप करण्यास सुरुवात केली आहे.