श्रीनगरच्या रंगरेथ भागात सुरक्षा दलांसोबत झालेल्या चकमकीत दोन अज्ञात दहशतवादी (Terrorist) ठार झाल्याची माहिती जम्मू-काश्मीर (Jammu Kashmir) पोलिसांनी (Police) सोमवारी दिली. अधिकाऱ्यांनी दिलेल्या माहिती नुसार, सुरक्षा दलांनी परिसरात शोध मोहीम सुरू केली आहे.

दक्षिण काश्मीरच्या पुलवामा (Pulwama) जिल्ह्यात सुरक्षा दलांनी जैश-ए-मोहम्मद (JeM) च्या स्थानिक दहशतवाद्याला एका चकमकीत ठार केल्यानंतर सोमवारची कारवाई केली. पोलिसांनी सांगितले की, त्यांनी भारतीय लष्कराच्या 42 राष्ट्रीय रायफल आणि केंद्रीय राखीव पोलीस दलाच्या (CRPF) 130 बटालियन समवेत अवंतीपोराच्या बरगाम परिसराला वेढा घातला.

“अडकलेल्या दहशतवाद्याला आत्मसमर्पण करण्याची भरपूर संधी देण्यात आली. मात्र, त्याने
आत्मसमर्पण करण्यास नकार दिला. त्याने संयुक्त शोध पथकावर अंदाधुंद गोळीबार केला. त्याला प्रत्युत्तर म्हणून पोलिसांनी देखील गोळीबार केला. या चकमकीत तो मारला गेला," असे पोलिसांनी सांगितले.