TMC Vs BJP: तृणमूल काँग्रेसचे ज्येष्ठ नेते आणि खासदार कल्याण बॅनर्जी यांनी गुरुवारी आक्षेपार्ह वक्तव्य केले आहे. धमकावल्यास आपले कार्यकर्ते भाजपच्या कार्यकर्त्यांचे हात छाटू शकतात, असे ते म्हणाले. व्यासपीठावर उपस्थित असलेल्या मुख्यमंत्री ममता बॅनर्जी यांच्यासोबत तृणमूल काँग्रेसच्या विशेष संघटनात्मक बैठकीत त्यांनी हे वक्तव्य केले.

दरम्यान, टीएमसी (TMC) खासदाराच्या वक्तव्यावर भाजपने लगेच चोख प्रत्युत्तर दिले. त्यांच्या वक्तव्यावरुन टीएमसीची मानसिकता दिसून येते, असे भाजपने म्हटले आहे. तर दुसरीकडे, खासदार कल्याण बॅनर्जी (Kalyan Banerjee) यांनी केलेले वक्तव्य त्यांचे वैयक्तिक वक्तव्य असल्याचे मुख्यमंत्री ममता बॅनर्जी (Mamata Banerjee) यांनी म्हटले आहे.

'दीदींनी शांत राहण्यास सांगितले'

खासदार कल्याण बॅनर्जी म्हणाले, 'दीदींनी मला शांत राहण्यास सांगितले आहे. त्यामुळेच मी शांत आहे. पण जर भाजप कार्यकर्त्यांनी आमच्याकडे बोट दाखवले किंवा आमचे हात तोडण्याची धमकी दिल्यास त्यांना सोडणार नाही.' कल्याण बॅनर्जी, एक व्यावसायिक वकील आणि हुगळी जिल्ह्यातील श्रीरामपूर मतदारसंघातून तीन वेळा खासदार राहिले आहेत. ते पुढे म्हणाले की, 'इतर लोक माझ्याबद्दल काय विचार करतात याची मला पर्वा नाही.'

'कल्याण यांची भाषा बोलता येत नाही'

मुख्यमंत्री ममता बॅनर्जी म्हणाल्या, 'कल्याण बॅनर्जी यांची भाषण करण्याची एक शैली आहे. मला त्यांच्या भाषणशैलीनुसार बोलता येत नाही. पण काही नेते (Opponents) हात, पाय तोडण्याची भाषा बोलत आहेत. राजकारण कसे केले जाते, हे त्यांना कळायला हवे. सार्वजनिक ठिकाणी बोलताना प्रत्येकाने काळजी घ्यावी.'

दरम्यान, भाजप (BJP) नेते सिलभद्र दत्ता यांनी टीएमसी खासदारावर जोरदार टीका केली. ते म्हणाले की, 'टीएमसी नेते ज्या प्रकारची भाषा बोलत आहेत, त्यावरुन स्पष्ट होते की, त्यांची नेमकी मानसिकता काय आहे.'