Tihar Jail Received Bomb Threat: दिल्लीतील तिहार जेल उडवून देण्याची बॉम्बची धमकी मिळाली आहे. मंगळवारी ईमेलद्वारे ही धमकी देण्यात आली. तिहार प्रशासनाने या धमकीची माहिती दिल्ली पोलिसांना दिली. अशा परिस्थितीत पोलीस प्रशासन तातडीने सतर्क झाले. घटनास्थळी पोलीस आणि श्वानपथक शोध मोहीम राबवत आहेत. याआधी दिल्लीतील काही शाळा, रुग्णालये आणि विमानतळ उडवून देण्याच्या धमकीचे ईमेल पाठवण्यात आले होते.

आता, मंगळवारी courtisgod123@beeble.com या ईमेल आयडीवरुन दिल्लीतील तिहार जेल उडवून देण्याची धमकी देणारा मेल पाठवण्यात आला. पोलिसांनी धमकी देणाऱ्या ईमेलची चौकशी सुरु केली आहे. पोलिसांनी सांगितले की, याच सर्व्हर (डोमेन) वरुन दिल्लीतील अनेक रुग्णालये आणि शाळांना धमकीचे ईमेल पाठवण्यात आले आहेत. आता हाच ईमेल तिहार तुरुंगात पाठवण्यात आला आहे.

तिहार तुरुंगातून मिळालेल्या धमकीच्या ईमेलमध्ये मी तुमच्या इमारतीत बॉम्ब ठेवल्याचे लिहिले आहे. हे सर्व बॉम्ब पुढील काही तासांत फुटतील. ही क्षुल्लक धमकी नाही. बॉम्ब निकामी करण्यासाठी तुमच्याकडे काही तास आहेत, नाहीतर इमारतीतील (तिहार जेल) निरपराधांचे रक्त तुमच्या हातावर असेल. तसेच, या हत्याकांडामागे 'कोर्ट' समूहाचा हात असल्याचे या ईमेलमध्ये खाली लिहिले आहे.