Bhagavad Gita in School Syllabus: भगवद्गीता हा आपल्या भारतीय संस्कृतीमधला अत्यंत महत्वाचा ठेवा आहे. मुलांमधील सांस्कृतिक मूल्ये लोप पावत असल्याने ते थांबविण्यासाठी कर्नाटकमधील शाळांत भगवद्गीतेचे पाठ शिकविण्याचा विचार राज्य सरकार करीत आहे. शालेय अभ्यासक्रमात नीतिशास्त्र शिकविले जावे, अशी अनेक नागरिकांची मागणी आहे, असे राज्याचे प्राथमिक आणि माध्यमिक शिक्षणमंत्री बी. सी. नागेश यांनी सांगितले. (The Bhagavad Gita will be included in the curriculum in schools in Karnataka)

कर्नाटकबरोबरच गुजरात सरकारही शाळांमध्ये भगवद्गीतेचा शालेय अभ्यासक्रमात (School Syllabus) समावेश करण्याचे नियोजन करत आहे. त्यानंतर आता कर्नाटकच्या शिक्षणमंत्र्यांनी हा निर्णय जाहीर केला आहे. पण तसे करण्याआधी शिक्षणतज्ज्ञांशी चर्चा करणार असल्याचे त्यांनी स्पष्ट केले. कर्नाटकमधील शाळांत नीतिशास्त्र शिकवायचे की नाही, याचा निर्णय मुख्यमंत्री बसवराज बोम्मई यांच्याशी चर्चा केल्यानंतर घेण्यात येणार आहे असे त्यांनी संगितले.

शाळांमध्ये यापूर्वी नीतिशास्त्राची एक तासिका घेतली जायची. ती प्रत्येक आठवडय़ात असायची. त्यात रामायण, महाभारत यांच्यातील कथांवर आधारित धडे दिले जायचे. आता भगवद्गीतेचा अभ्यासक्रमात समावेश केल्याने विद्यार्थ्यांच्या नितीमत्तेत भर पडणार असल्याचे मत नागेश यांनी व्यक्त केले.