Shopian Encounter: जम्मू-काश्मीरच्या शोपियानमध्ये मंगळवारी सुरक्षा दलाला मोठे यश मिळाले. या चकमकीत सुरक्षा दलांनी तीन दहशतवाद्यांना ठार केले. काश्मीर झोन पोलिसांनी दिलेल्या माहितीनुसार, ठार झालेले दहशतवादी लष्कर-ए-तैयबा (Lashkar-e-Taiba) चे सदस्य होते, ज्यांना खोऱ्यात मोठी कारवाई करायची होती.

पोलीस अधिकाऱ्याने सांगितले की, शोपियानच्या (Shopian) नागबल भागात दहशतवाद्यांच्या उपस्थितीची माहिती मिळाल्यानंतर सुरक्षा दलांनी घेराबंदी आणि शोध मोहीम सुरु केली. ऑपरेशन दरम्यान चकमक झाली, ज्यामध्ये सुरक्षा दलांनी तीन दहशतवाद्यांना (Terrorists) ठार केले.

काश्मीरचे एडीजीपी विजय कुमार (ADGP Kashmir Vijay Kumar) यांनी सांगितले की, ठार झालेले तीन दहशतवादी लष्कर-ए-तैयबाचे स्थानिक दहशतवादी आहेत. दानिश खुर्शीद भट, तन्वीर वानी आणि तौसीफ भट अशी या दहशतवाद्यांची नावे आहेत. या दहशतवाद्यांचा यापूर्वी काश्मीरमधील अनेक दहशतवादी घटनांमध्ये सहभाग होता. एडीजीपी विजय कुमार यांनी पुढे सांगितले की, यापैकी दानिश नावाचा दहशतवादी शोपियानमध्ये तरुणांना फसवून दहशतवादी बनवण्याचे काम करायचा.