Sadhana Gupta: उत्तर प्रदेशचे माजी मुख्यमंत्री आणि समाजवादी पक्षाचे प्रमुख मुलायम सिंह यादव यांच्या दुसऱ्या पत्नी साधना गुप्ता यांचे शनिवारी निधन झाले. साधना गुप्ता काही दिवसांपासून आजारी होत्या. नुकतेच त्यांना गुरुग्राममधील मेदांता रुग्णालयात दाखल करण्यात आले होते. साधना यांची प्रकृती चिंताजनक असल्याने त्यांना आयसीयूमध्ये ठेवण्यात आले होते, शनिवारी सकाळपासून त्यांची प्रकृती चिंताजनक होती, अखेर तिथे त्यांनी दुपारी अखेरचा श्वास घेतला.

दरम्यान, मेदांता हॉस्पिटलकडून त्यांच्या मृत्यूला अद्याप अधिकृत दुजोरा मिळालेला नाही. काही वेळापूर्वी मुलायमसिंह यादव (Mulayam Singh Yadav) पत्नीला भेटण्यासाठी रुग्णालयातून गेले होते.

दुसरीकडे, गेल्या आठवड्यापासून त्या शुगरसह इतर विविध आजारांनी त्रस्त होत्या. मुलायम सिंह यांच्या पत्नी साधना गुप्ता (Sadhana Gupta) यांचे पार्थिव प्रथम दिल्ली आणि नंतर सैफई येथे नेण्यात येणार आहे. मुलायमसिंह यादव सध्या दिल्लीत असून, अखिलेशही लखनौहून निघाले आहेत.

तसेच, साधना गुप्ता या सपा नेते मुलायम सिंह यादव यांच्या दुसऱ्या पत्नी असून सपा प्रमुख अखिलेश यादव (Akhilesh Yadav) यांच्या सावत्र आई आहेत. साधना यांच्या मुलाचे नाव प्रतीक यादव आणि सुनेचे नाव अपर्णा यादव आहे. आपल्या स्पष्टवक्त्या वक्तव्यासाठी प्रसिद्ध असलेल्या अपर्णा यादव या भाजपच्या नेत्या आहेत. 2022 च्या विधानसभा निवडणुकीपूर्वीच अपर्णा यादव यांनी सपा सोडून भाजपमध्ये प्रवेश केला होता.