भारतीय वायुसेनेचे (IAF) प्रमुख मार्शल विवेक राम चौधरी (Vivek Ram Chaudhari) यांनी शनिवारी डसॉल्ट राफेल लढाऊ विमाने भारताला वेळेवर पोहोचवल्याबद्दल फ्रान्सचे आभार मानले व उर्वरित राफेल (Rafale) देशात कधी दाखल होतील याची माहिती दिली. मागवलेल्या 36 पैकी 32 राफेल देशात पोचले आहेत. उर्वरित 4 पैकी 3 लढाऊ विमाने पुढील वर्षी फेब्रुवारीपर्यंत वितरित केले जातील तर उर्वरित एकाचे वितरण सर्व चाचण्या पूर्ण झाल्यानंतरच होईल.

“करार 36 विमानांसाठी होता, त्यापैकी 32 आधीच वितरित केले गेले आहेत. उर्वरित चारपैकी तीन फेब्रुवारीमध्ये वेळेवर पोहोचतील. शेवटचे विमान, ज्यात विशिष्ट सुधारणा असतील, त्याच्या सर्व चाचण्या पूर्ण झाल्यानंतरच ते भारताला (India) मिळेल. आम्ही संरक्षणमंत्र्यांशी राफेलच्या भविष्यातील देखभालीच्या मुद्द्यांवर चर्चा केली आहे," असे मार्शल विवेक राम चौधरी म्हणाले.

फ्रान्सचे संरक्षण मंत्री फ्लोरेन्स पार्ली यांनी काही दिवसांपूर्वी सांगितले होते की, फ्रान्स (France) भारताला अतिरिक्त राफेल लढाऊ विमाने देण्यास तयार आहे. पार्ली यांनी प्रादेशिक सुरक्षा आणि इंडो-पॅसिफिकमधील सहकार्यावर पंतप्रधान नरेंद्र मोदी आणि संरक्षण मंत्री राजनाथ सिंह यांच्याशीही चर्चा केली. या वेळेस सर्व क्षेत्रांमध्ये संरक्षण सहकार्य वाढवण्याच्या मार्गांवरही चर्चा झाली.

चौधरी यांनी भारत-चीन (Indo-China) सीमेवरील परिस्थिती वर भाष्य केले. ते म्हणाले, "लडाखमधील काही भागातून सैन्याने माघार घेतली असली तरी, संपूर्ण सैन्य परतलेले नाही."