अल्लू अर्जुनच्या 'पुष्पा 2' चित्रपटाचा बुधवारी हैदराबादमध्ये प्रीमियर झाला, ज्यादरम्यान चेंगराचेंगरी झाली. संध्या थिएटरबाहेर झालेल्या चेंगराचेंगरीत एका महिलेचा मृत्यू झाला असून दोन जण जखमी झाले. त्यांना रुग्णालयात दाखल करण्यात आले आहे. बुधवारी (4 डिसेंबर) अल्लू अर्जुन 'पुष्पा 2' च्या स्क्रिनिंगसाठी हैदराबाद येथील संध्या थिएटरमध्ये पोहोचला होता. अल्लूला पाहण्यासाठी थिएटरबाहेर मोठ्यासंख्येने त्याचे चाहते जमले होते. यादरम्यान चेंगराचेंगरी झाली. जमावावर नियंत्रण ठेवण्यासाठी पोलिसांना लाठीचार्ज करावा लागला, ज्यामध्ये एका महिलेचा मृत्यू आणि दोन जण जखमी झाले.

अल्लू अर्जुनचा बहुप्रतिक्षित चित्रपट पुष्पा 2: द रुल आज 5 डिसेंबर 2024 रोजी चित्रपटगृहांमध्ये प्रदर्शित झाला आहे. तत्पूर्वी एक दिवस आधी बुधवारी रात्री आरटीसी चौकात असलेल्या संध्या थिएटरमध्ये प्रीमियर शो झाला, ज्यादरम्यान एका 39 वर्षीय महिलेला आपला जीव गमवावा लागला. तर तिच्या मुलांची प्रकृती गंभीर आहे. मीडिया रिपोर्ट्सनुसार, दिलसुखनगरमधील रेवती यांनी पती भास्कर आणि आपल्या दोन मुलांसह चित्रपटाच्या प्रीमियरला हजेरी लावली होती. यादरम्यान झालेल्या चेंगराचेंगरीत रेवती यांचा मृत्यू झाला.

लोकांनी मदत केली, पण महिलेचा मृत्यू झाला

व्हायरल झालेल्या व्हिडिओमध्ये पोलिस आणि आसपासचे लोक पीडितेच्या मदतीसाठी धावताना दिसत आहेत. रेवती यांना रुग्णालयात नेण्यापूर्वी त्यांना सीपीआर देण्याचा प्रयत्न करण्यात आला होता. मुलाची प्रकृती चिंताजनक असून रेवती यांचा मृत्यू झाला.