प्रयागराज: उत्तर प्रदेशातील प्रयागराजमध्ये व्हॅलेंटाईन डेच्या दिवशी एक धक्कादायक आणि मन सुन्न करणारी घटना समोर आली आहे. एनडीए (NDA) परीक्षेची तयारी करणाऱ्या १७ वर्षीय आशुतोष प्रताप गिरी उर्फ अमन याने आपल्या खोलीत गळफास लावून आपली जीवनयात्रा संपवली. प्रेयसीसोबत झालेल्या वादातून त्याने हे पाऊल उचलल्याचे प्राथमिक तपासात समोर आले आहे. मात्र, मुलाच्या पायाची स्थिती आणि प्रेयसीने पाठवलेले मेसेज पाहता, कुटुंबीयांनी या प्रकरणाला संशयास्पद ठरवून हत्येचा आरोप केला आहे.
मूळचा प्रतापगडचा असलेला आशुतोष प्रयागराजमध्ये राहून एनडीएची तयारी करत होता. तिथेच कोचिंग क्लासमध्ये शिकणाऱ्या एका तरुणीशी त्याचे प्रेमसंबंध होते. व्हॅलेंटाईन डेच्या दिवशी सर्वत्र आनंदाचे वातावरण असताना, आशुतोषच्या खोलीत मात्र त्याचा मृतदेह लटकलेल्या अवस्थेत आढळला. या घटनेमुळे परिसरात एकच खळबळ उडाली असून त्याच्या कुटुंबीयांनी जार्ज टाऊन पोलीस ठाण्यात धाव घेत न्यायाची मागणी केली आहे.
आशुतोषच्या वडिलांनी पोलिसांना दिलेल्या माहितीनुसार, संबंधित तरुणी आणि तिचे पाच मित्र आशुतोषला ब्लॅकमेल करत होते. घटनेच्या आदल्या दिवशी तरुणीने आशुतोषच्या मोबाईलवर "मर जा" (मरून जा) असा मेसेज पाठवला होता. एवढेच नाही तर पोलिसांना एक चिठ्ठीही सापडली आहे, ज्यामध्ये "मी तुझ्यासोबत राहू शकत नाही, तू मरून जा, मला काही देणंघेणं नाही," असे शब्द लिहिलेले आहेत. या मेसेजनंतर आशुतोषने आत्महत्या केल्याचा संशय व्यक्त केला जात आहे.
कुटुंबीयांनी आत्महत्येच्या दाव्यावर प्रश्नचिन्ह उपस्थित केले आहे. आशुतोषचा मृतदेह जेव्हा फंद्याला लटकलेला होता, तेव्हा त्याचे दोन्ही पाय जमिनीला टेकलेले आणि दुमडलेले होते. ही स्थिती पाहून कुटुंबीयांनी ही आत्महत्या नसून घातपात असण्याची शक्यता वर्तवली आहे. पोलिसांनी आशुतोषचा मोबाईल जप्त केला असून व्हॉट्सॲप चॅट्स आणि कॉल रेकॉर्ड्सची कसून तपासणी केली जात आहे.
जार्ज टाऊन पोलिसांनी या प्रकरणी गुन्हा दाखल केला असून संबंधित तरुणीला चौकशीसाठी ताब्यात घेतले आहे. "आम्ही सर्व बाजूंनी तपास करत आहोत. पोस्टमार्टम रिपोर्ट आल्यानंतरच मृत्यूचे नेमके कारण स्पष्ट होईल. पीडित कुटुंबाला न्याय मिळवून दिला जाईल," असे पोलीस प्रशासनाकडून सांगण्यात आले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.