नवी दिल्ली: कोरोना प्रतिबंधक लसीकरणानंतर दिल्या जाणाऱ्या प्रमाणपत्रापाठोपाठ आता पंतप्रधान गरीब कल्याण अन्न योजनेअंतर्गत गरिबांना देण्यात येणाऱ्या धान्याच्या गोण्यांवरही पंतप्रधान नरेंद्र मोदी (Narendra Modi) यांची छबी भाजपच्या ‘कमळ’ या निवडणूक चिन्हासह झळकणार आहे. सरकारच्या या निर्णयावरून विरोधक सरकारला पुन्हा धारेवर धरण्याची शक्यता आहे. (Photo of Narendra Modi on the sacks of grain given to the poor)

भाजप कार्यकर्त्यांनी ही योजना जोरदार राबविताना धान्य वाटप सुरू असलेल्या प्रत्येक दुकानात उभे राहून मोदींचे छायाचित्र असलेली एक एक ‘कमलांकित' गोणी किंवा पिशवी लाभार्थींच्या हाती दिलीच पाहिजे, असे निर्देश देणारे पत्र दिल्लीतून देशभरातील कार्यकर्त्यांना पाठविण्यात आले आहे. कोरोना काळात कोट्यवधी गरिबांच्या पोटावर पाय आल्याने पंतप्रधानांनी गरीब कल्याण योजनेतील मोफत धान्य वाटपास यंदाच्या दिवाळीपर्यंत मुदतवाढ दिली होती.