Nitish Kumar Resign: नितीश कुमार यांनी बिहारच्या मुख्यमंत्री पदाचा राजीनामा दिला आहे. राजीनामा देऊन संसदेतून बाहेर पडल्यानंतर नितीश कुमार यांनी माध्यमांबरोबर संवाद साधला आहे. आम्ही काम करण्याचा प्रयत्न केला मात्र आम्हाला आमचे काम करु दिले जात नव्हते. नवीन युतीसोबत काम करण अशक्य होते. त्यामुळे आम्ही वेगळे होण्याचा निर्णय घेतला अशा आशयाचे वक्तव्य नितीश कुमार यांनी केले आहे. आपण आपल्या पक्षातील सर्वांच्या परवानगी आणि सहमतीनेच हा निर्णय घेतल्याचे त्यांनी म्हटले आहे.

आरजेडी ( RJD ) आणि जेडीयू ( JDU ) यांच्यामध्ये मोठ्या प्रमाणात मतभेद होते. जातनिहाय जणगणना, आरक्षण, सरकारी नोकऱ्यांमधील भरती अशा अनेक मोठ्या आणि महत्वाच्या कामाचे श्रेय आरजेडी घेण्याचा प्रयत्न करत असे. अशावेळी लोकहिताची कामे करतानादेखील अडथळा निर्माण झाला आहे. असेही नितीश कुमार यांनी म्हटले आहे. भाजप सरकारने त्यांच्या या निर्णयाला पाठिंबा दर्शवला आहे, त्यामुळे ते पुन्हा एकदा एनडीए सोबत युती करणार असल्याची चिन्हे पाहायला मिळत आहे.

दरम्यान, याआधी नितीश कुमार यांनी भाजपसोबतची युती समाप्त करत आरजेडीबरोबर युती केली होती. आता पुन्हा ते आरजेडीबरोबरच्या युतीमधून देखील बाहेर पडले आहेत. त्यांच्या या निर्णयानंतर त्यांच्यावर मोठ्या प्रमाणात टीका होताना पाहायला मिळत आहे. लालू प्रसाद यादव यांच्या मुलीने सोशल मीडिया प्लॅटफॉर्म एक्स वर कचरा परत कचरापेटीत गेला अशा आशयाचे ट्वीट केले आहे. असे म्हटले जात आहे की, आगामी लोकसभा निवडणूकांच्या धर्तीवर त्यांनी हा निर्णय घेतला आहे. नितीश कुमार यांच्या राजीनाम्यानंतर आणि सरकार संपुष्टात आल्यानंतर बिहारचे राजकारण कोणते वळण घेणार हे पाहणे महत्वाचे ठरणार आहे.