देशातील ओमिक्रॉनच्या एकूण रुग्णांची संख्या शंभरी पार केली आहे. आरोग्य मंत्रालयाने शुक्रवारी पत्रकार परिषद घेऊन कोरोना विषाणूच्या ओमिक्रॉन (omicron variant) या नवीन व्हेरिएंटबाबत अपडेट दिले आहे. आरोग्य मंत्रालयाचे संयुक्त सचिव लव अग्रवाल (Lav Agarwal) यांनी पत्रकार परिषदेला संबोधित करताना म्हटले की, देशात ओमिक्रॉनची एकूण संख्या 100 च्या वर गेली आहे.

दरम्यान, ते म्हणाले, जगभरातील 91 देशांमध्ये ओमिक्रॉनचे रुग्ण आढळले आहेत. डब्ल्यूएचओने म्हटले आहे की, दक्षिण आफ्रिकेत (South Africa) ओमिक्रॉनचा प्रसार डेल्टा व्हेरिएंटपेक्षा (Delta variant) वेगाने होत आहे.

महाराष्‍ट्र- 32

दिल्ली- 22

राजस्थान- 17

कर्नाटक- 8

तेलंगाना- 8

केरल- 5

गुजरात- 5

आंध्र प्रदेश- 1

तमिलनाडु- 1

चंडीगढ़- 1

पश्चिम बंगाल- 1

कोरोनाचे रुग्ण 10 हजारांहून कमी आले आहेत

त्यांनी पुढे सांगितले की, गेल्या 20 दिवसांपासून सातत्याने कोरोनाचे 10 हजारांहून कमी प्रकरणे समोर येत आहेत. गेल्या एका आठवड्यात पॉझिटीव्हीटी रेट 0.65 टक्के होता. देशातील एकूण सक्रिय रुग्णांपैकी 40.31 टक्के एकट्या केरळमध्ये आहेत.

19 जिल्ह्यांमध्ये संसर्गाचे प्रमाण खूप जास्त आहे

लव अग्रवाल पुढे म्हणाले की, देशात 19 जिल्हे आहेत जिथे संसर्ग खूप जास्त आहे. तेथे साप्ताहिक पॉझिटीव्हीटी रेट 5-10 टक्क्यांच्या दरम्यान आहे. केरळमध्ये असे 9 जिल्हे, मिझोराममध्ये 5 जिल्हे, नागालँड, राजस्थान, सिक्कीम, अरुणाचल प्रदेश, पश्चिम बंगालमध्ये प्रत्येकी एक जिल्हे आहेत.