MIG-21 Plane Crash: राजस्थानमधील बारमेरमध्ये मिग विमान कोसळले आहे. बारमेरच्या भीमडा गावात मिग विमान कोसळल्याची बातमी आहे. लोकांनी मोठ्या आवाजात आगीच्या प्रचंड ज्वाळा पाहिल्या. मिग अपघाताच्या बातमीने गावात घबराट पसरली आहे. दुसरीकडे, प्रशासन घटनास्थळी रवाना झाले आहे. सूत्रांनी दिलेल्या माहितीनुसार, या अपघातात दोन्ही वैमानिकांचा मृत्यू झाला आहे. सीमावर्ती बारमेर जिल्ह्यात शुक्रवारी रात्री 9 वाजण्याच्या सुमारास भारतीय हवाई दलाचे मिग-21 विमान कोसळले.

दरम्यान, बारमेरचे जिल्हाधिकारी लोक बंधू यांनी सांगितले की, "बाइटू येथील भीमडा गावाजवळ हे हवाई दलाचे विमान (Plane) कोसळले." संरक्षण मंत्री राजनाथ सिंह (Rajnath Singh) यांनी हवाई दल प्रमुखांशी बोलून अपघाताची माहिती घेतली आहे. हवाईदल प्रमुखांनी त्यांना अपघाताची माहिती दिली आहे.

दुसरीकडे, मिग Mi-21 बायसन विमान 1960 च्या दशकात भारतीय हवाई दलाने समाविष्ट करण्यास सुरुवात केली. भारतीय हवाई दलाने गेल्या काही वर्षांत अनेक मिग-21 विमाने आणि इतर विमाने विविध अपघातांमध्ये गमावली आहेत. सध्या, भारतीय हवाई दलाकडे (Indian Air Force) मिग-21 बायसनचे सुमारे सहा स्क्वॉड्रन आहेत. एका स्क्वॉड्रनमध्ये सुमारे 18 विमाने येतात.