Mehbooba Mufti On BJP: जम्मू-काश्मिरमध्ये किती वाट्टेल तेवढे सैनिक तैनात करा, जोपर्यंत काश्मिरचा मुद्दा निकालात निघत नाही तोपर्यंत सकारात्मक परिणाम दिसणार नाहीत. गांधी-नेहरूंचा देश भाजपचा होऊ देणार नाही, असे आव्हान जम्मू काश्मिरच्या माजी मुख्यमंत्री आणि पीपुल्स डेमोक्रेटिक पार्टी (पीडीपी) च्या प्रमुख मेहबूबा मुफ्ती केंद्र सरकार आणि भाजपला दिले आहे. (Jammu Kashmir News)

श्रीनगरमध्ये पक्षाच्या युवा संमेलनात त्या बोलत होत्या. मुफ्ती म्हणाल्या की, जेव्हा हल्लेखोर पाकिस्तानातून आले होते तेव्हा भारतीय सैन्य आले नव्हते. लोकांच्या हातात बंदुका नव्हत्या. पण तरीही लोकांनी त्या हल्लेखोरांना पळवून लावले होते. काश्मिरी जनतेला माहिती आहे, हल्लेखोऱांना कसे पळवून लावायचे ते. जेव्हा हिंदु आणि मुस्लीम धर्मावरून लढत होते तेव्हा काश्मिर हेच एकमेव ठिकाण होते जिथे मुस्लिमांनी काश्मिरी पंडित, हिंदू आणि शीखांना वाचवले होते.

मी आजच्या भारताविषयी बोलत नाही तर मी त्या भारताविषयी बोलत आहे जो भारत महात्मा गांधींचे नातू तुषार गांधी आणि जवाहरलाल नेहरू यांचे नातू राहुल गांधी शोधत आहेत. नेहरू आणि गांधी यांनी जो भारत बनवला त्या भारताविषयी मी बोलत आहे. भाजपने संविधान संपवले आहे. गांधी-नेहरूंचा भारत आम्ही भाजपचा भारत बनू देणार नाही.

आम्हाला संविधानाचे नाते हवे होते, पण भाजप संविधानच नष्ट करत आहे. जर पंचायत निवडणुका तत्काळ घ्याव्यात, असे आवाहनही मुफ्ती यांनी केले. दरम्यान, आता भाजपवर तोंड सुख घेत असलेल्या मुफ्ती या भाजपसोबतच आघाडी करून जम्मू-काश्मिरध्ये सत्तेत राहिल्या होत्या. भाजपच्या पाठिंब्यावर त्या मुख्यमंत्री बनल्या होत्या.