ऑस्ट्रेलियाचा लोकप्रिय अष्टपैलू क्रिकेटपटू मार्कस स्टॉइनिस आता वैयक्तिक आयुष्यात नवी इनिंग सुरू करणार आहे. त्याने आपल्या प्रेयसी आणि ऑस्ट्रेलियन मॉडेल सारा चार्नाच हिच्याशी साखरपुडा केला आहे.

दोघेही 2021 पासून रिलेशनशिपमध्ये असून, स्पेनमध्ये एका सुंदर समुद्रकिनाऱ्यावर बोटीत बसून स्टॉइनिसने साराला रोमँटिक अंदाजात प्रपोज केले. या क्षणाचे फोटो आणि व्हिडीओ सोशल मीडियावर तुफान व्हायरल झाले आहेत.

सारा चार्नाच कोण आहे?

सारा चार्नाच ही 27 वर्षीय ऑस्ट्रेलियन मॉडेल, कंटेंट क्रिएटर आणि ब्युटी एंटरप्रेन्योर आहे. तिचा जन्म 7 डिसेंबर 1997 रोजी व्हिक्टोरियातील साउथ गिलाँग येथे झाला. 2013 मध्ये तिने मिस टुरिझम ऑस्ट्रेलिया किताब जिंकून मॉडेलिंग क्षेत्रात प्रवेश केला.

त्यानंतर तिने डीकिन विद्यापीठातून पत्रकारिता आणि जनसंपर्क या विषयात पदवी घेतली आणि फॅशन व मीडिया क्षेत्रात आपला ठसा उमटवला. सारा सोशल मीडियावरही अत्यंत सक्रिय असून तिच्या इंस्टाग्रामवर 1.29 लाखांहून अधिक फॉलोअर्स आहेत. ती फिटनेस टिप्स, ब्युटी आणि फॅशन संबंधित कंटेंटसाठी विशेष लोकप्रिय आहे.

मार्कस स्टॉइनिसची क्रिकेट कारकीर्द

मार्कस स्टॉइनिस हा ऑस्ट्रेलियन संघासाठी एक विश्वासार्ह आणि प्रभावी ऑलराउंडर म्हणून ओळखला जातो. त्याने आपल्या दमदार फलंदाजी आणि मध्यमगती गोलंदाजीच्या जोरावर आंतरराष्ट्रीय क्रिकेटमध्ये स्वतःची वेगळी छाप निर्माण केली आहे.

आत्तापर्यंत त्याने 71 एकदिवसीय सामन्यांमध्ये 1495 धावा करताना 48 विकेट्स घेतल्या आहेत. तसेच 74 टी20 आंतरराष्ट्रीय सामन्यांमध्ये त्याने 1245 धावा केल्या असून गोलंदाजीत 45 विकेट्स मिळवल्या आहेत. 2021 च्या टी20 विश्वचषक विजयात आणि 2023 च्या एकदिवसीय विश्वचषक विजयात स्टॉइनिसने महत्वाची आणि निर्णायक भूमिका बजावत ऑस्ट्रेलियाला विजेतेपद मिळवून दिले.