Bharat Jodo Yatra: काँग्रेस पक्षाच्या भारत जोडो यात्रेत सहभागी होणे मध्य प्रदेशातील एका शिक्षकाला चांगलेच महागात पडले. शिक्षण विभागाने त्यांना निलंबित केले आहे. ही घटना बरवानी जिल्ह्यातील आहे. 24 नोव्हेंबर रोजी कुंझरी येथील शासकीय प्राथमिक शाळेचे शिक्षक राजेश कन्नौजे हे तेथून निघालेल्या भारत जोडो यात्रेत सहभागी झाले होते.

दरम्यान, काँग्रेस खासदार राहुल गांधी (Rahul Gandhi) यांच्यासोबतचा कन्नौजे यांचा फोटो व्हायरल होत आहे. राजेश यांनी सांगितले की, 'राहुल गांधींनी मला मिठी मारली. त्यांनी माझे नाव आणि परिचय विचारला. समाजाचे प्रश्न अनेकदा सत्ताधारी आणि विरोधी पक्षांच्या नेत्यांसमोर मांडत असल्याचे मी त्यांना सांगितले. माझा कोणत्याही पक्षीय राजकारणाशी संबंध नाही.'

या नियमांचे उल्लंघन केल्याचे विभागाने सांगितले

पुढे रजेचा अर्ज केल्यानंतर या यात्रेत सहभागी होण्यासाठी गेल्याचे कन्नौजे यांनी माध्यमांशी बोलताना सांगितले. त्याचबरोबर विभागाने निलंबन पत्रात हे सरकारी नियमांचे उल्लंघन असल्याचे म्हटले आहे. राजेश कन्नौजे यांना तडकाफडकी निलंबित करण्यात आले आहे.

माहितीनुसार, आदिवासी विभागाचे सहाय्यक आयुक्त, नीलेश रघुवंशी यांनी कुंजरी येथील शासकीय प्राथमिक शाळेचे शिक्षक राजेश कन्नौजे यांना तत्काळ निलंबित केले आहे. आदेशात, राजेश कन्नौजे यांचा 24 नोव्हेंबर रोजी काँग्रेसचे ज्येष्ठ नेते राहुल गांधी आणि प्रियंका गांधी वड्रा यांच्यासह राजकीय रॅलीत सहभागी होणे हे नागरी सेवा आचार नियमांचे उल्लंघन मानले गेले आहे.