Bharatiya Janata Party: भारतीय जनता पक्षाने ( BJP) उत्तराखंडमध्ये मोठे फेरबदल केले आहेत. पक्षाचे प्रदेशाध्यक्ष मदन कौशिक यांना त्यांच्या पदावरुन हटवण्यात आले आहे. आता त्यांच्या जागी महेंद्र भट्ट यांना उत्तराखंड भाजपचे अध्यक्ष बनवण्यात आले आहे. बद्रीनाथ विधानसभा मतदारसंघातून महेंद्र भट्ट यांचा पराभव झाला होता. मात्र, 50 वर्षीय भट्ट नंदप्रयाग विधानसभा मतदारसंघातून आमदार राहिले आहेत. कौशिक यांना सरकारमध्ये स्थान दिले जाण्याची शक्यता वर्तवली जात आहे.

दरम्यान, गढवाल भागातील ब्राह्मण नेते भट्ट यांची प्रदेशाध्यक्षपदी नियुक्ती करुन भाजपने (BJP) जात आणि प्रदेश यांच्यात समतोल साधण्याचा प्रयत्न केला आहे. मुख्यमंत्री पुष्कर सिंह धामी हे कुमाऊं प्रांताचे ठाकूर आहेत.

तसेच, पीटीआयने पक्षाच्या एका वरिष्ठ नेत्याचा हवाला देत म्हटले आहे की, अखिल भारतीय विद्यार्थी परिषद आणि भाजपच्या युवा शाखेत काम केल्यानंतर भट्ट यांचा दर्जा वाढला आहे. त्यांना RSS ची पार्श्वभूमी आहे.