नवी दिल्ली: गोव्यासह जगभरातील कोकणी भाषिक समुदायासाठी हा एक अत्यंत अभिमानास्पद आणि ऐतिहासिक दिवस ठरणार आहे. आता लोकसभेचे संपूर्ण कामकाज कोकणी भाषेत थेट ऐकण्याची सोय उपलब्ध झाली असून यासाठी इव्हिटा डिसोझा, गौरी मावलिणकर आणि समीक्षा वेळीप यांची 'कोकणी दुभाषी' (Konkani Consultant Interpreters) म्हणून लोकसभा सचिवालयात नियुक्ती करण्यात आली आहे.

या ऐतिहासिक क्षणाच्या निमित्ताने मुख्यमंत्री डॉ. प्रमोद सावंत यांनी नवी दिल्लीत या तिन्ही दुभाषींची भेट घेऊन त्यांचे अभिनंदन केले. या नियुक्तीमुळे आता लोकसभेचे कामकाज स्वतंत्र भारताच्या इतिहासात पहिल्यांदाच कोकणी भाषेत अनुवादित होऊन थेट प्रसारित होणार आहे.

शरत कृष्णा रायकर यांच्या मार्गदर्शनाखाली या तिन्ही दुभाषींना प्रशिक्षण दिले गेले असून सोमवार, १८ ऑगस्ट २०२५ पासून लोकसभेचे कामकाज पूर्णपणे कोकणी भाषेत थेट प्रसारित होण्यास सुरुवात होईल. यामुळे कोकणी भाषेला एक विशेष दर्जा प्राप्त झाला आहे. या यशाबद्दल मुख्यमंत्री डॉ. सावंत यांनी शरत रायकर, इव्हिटा डिसोझा, गौरी मावलिणकर आणि समीक्षा वेळीप यांचे अभिनंदन केले आहे.