कर्नाटकमध्ये भारतीय किसान युनियनचे (बीकेयू) नेते राकेश टिकैत (Rakesh Tikait) यांच्या सुरक्षेबाबत मोठा निष्काळजीपणा असल्याचे दिसून आले आहे. बेंगळुरू येथील गांधी भवन येथे पत्रकार परिषदेदरम्यान एका व्यक्तीने टिकैत यांच्या अंगावर काळी शाई फेकली. या घटनेचा व्हिडिओही सध्या सोशल मीडियावर व्हायरल होत आहे. याप्रकरणी कारवाई करत पोलिसांनी तिघांना अटकेत घेतले आहे. (Karnataka Ink thrown on farmer leader Rakesh Tikait Three in police custody)

शाई ओतल्याप्रकरणी बीकेयूचे नेते राकेश टिकैत म्हणाले की, स्थानिक पोलिसांनी येथे मला कोणतीही सुरक्षा पुरवली नाही. हे सर्व सरकारच्या संगनमताने होत असल्याचा आरोप त्यांनी यावेळी केला आहे.

तीन केंद्रीय कृषी कायद्यांविरोधात दिल्ली-यूपीच्या गाझीपूर सीमेवर वर्षभराहून अधिक काळ शेतकरी आंदोलनाचे नेतृत्व करणारे भारतीय किसान युनियनचे राष्ट्रीय प्रवक्ते राकेश टिकैत हे आता एकटे पडल्याचे चित्र दिसून येत आहे. एकंदरीत, देशातील मोठे शेतकरी नेते महेंद्रसिंह टिकैत यांच्या जयंतीनिमित्त भारतीय किसान युनियनमध्ये फूट पडली आहे. फुट पडण्यामागे राकेश टिकैत यांची बेताल वक्तव्ये आणि कृत्ये असल्याचे मानले जाते.