घरकाम आणि ऑफिसच्या कामातून मोकळीक मिळावी यासाठी लोक सुट्टी एन्जॉय करायला जात असतात. सुट्या तुम्हाला रिफ्रेश करतात. घर आणि ऑफिस सांभाळण्यात महिला खूप व्यस्त असतात त्यामुळे महिलांना स्वतःकडे लक्ष द्यायाला वेळ मिळत नाही. त्यामुळे महिलांसाठी सुट्टी खूप महत्त्वाची असते.

दरम्यान, यावर्षी महिला दिनानिमित्त IRCTC ने महिलांसाठी मोठी भेट दिली असून, कमी पैशात गोव्याची सैर करता येणार आहे. (IRCTC Goa Tour Package For Women's Day 2023)

दरवर्षी 08 मार्च रोजी आंतरराष्ट्रीय महिला दिन साजरा केला जातो. या खास प्रसंगी IRCTC ने महिलांना कमी पैशात गोव्यात जाण्याची संधी दिली आहे. महिला दिन स्पेशल गोवा डिलाइट एक्स भुवनेश्वर नावाचे हे टूर पॅकेज 07 मार्चपासून सुरू होणार आहे.

या पॅकेजअंतर्गत तुम्हाला गोव्यात चार रात्री आणि पाच दिवस राहण्याची संधी मिळणार आहे. ज्यामध्ये गोव्यातील सुंदर समुद्रकिनारा, तेथील संस्कृती आणि मनमोहक निसर्गाचा आनंद घेता येणार आहे.

IRCTC चे हे विशेष पॅकेज मार्च आणि एप्रिल महिन्यासाठी आहे. यामध्ये फ्लाइटचे भाडे, 3 स्टार हॉटेलमध्ये राहण्याची व्यवस्था, एसी बसचा समावेश आहे. उत्तर गोवा आणि दक्षिण गोव्यातील प्रेक्षणीय स्थळांव्यतिरिक्त, यात क्रूझ राईड आणि गाला डिनरचा समावेश असेल, असे एका रेल्वे अधिकाऱ्याने सांगितले आहे.

या टूर पॅकेज अंतर्गत प्रवास करायचा असेल तर 07 मार्चपासून बुकिंग करावे लागेल. यानंतर, तुम्हाला गोव्याला जाण्यासाठी भुवनेश्वरहून गोव्याला जाणारे विमान गाठावे लागेल. गोव्यात 3 स्टार हॉटेलमध्ये राहण्याची सुविधा मिळेल.

या टूर अंतर्गत, तुम्हाला सुंदर समुद्रकिनारे, लेणी आणि धबधबे, रेइस मागोस किल्ला इत्यादी पाहता येईल. याशिवाय महिलांना क्रूझ आणि गाला डिनरचा आनंदही घेता येईल.

गोवा टूरसाठी तुम्हाला खूप कमी खर्च असेल. या संपूर्ण टूर पॅकेजसाठी दोन व्यक्तींना 25,745 रुपये आणि तीन व्यक्तींना 24,615 रुपये मोजावे लागणार आहेत.

यामध्ये भुवनेश्वर ते गोव्याचे विमान तिकीट, चार रात्री गोव्यात हॉटेलमध्ये राहणे, चार वेळचा नाश्ता आणि रात्रीचे जेवण, मांडवी नदीवरील क्रूझ तिकीट, गाईडची व्यवस्था या सुविधा उपलब्ध असतील. या टूर पॅकेजशी संबंधित अधिक माहितीसाठी तुम्ही IRCTC च्या अधिकृत वेबसाइटला भेट देऊ शकता.