स्टेडियममध्ये कुत्र्याला फिरवण्याची मागणी करणाऱ्या आयएएस अधिकाऱ्यावर केंद्र सरकारने कारवाई केली आहे. संजीव खिरवार यांची लडाख येथे बदली करण्यात आली आहे. संजीव खिरवार यांच्या पत्नी IAS रिंकू दुग्गा यांची अरुणाचल प्रदेशात बदली करण्यात आली.

दरम्यान, त्यागराज स्टेडियमच्या ट्रॅकवर IAS अधिकाऱ्याने कुत्र्याची सैर केल्यामुळे खेळाडूंना सराव करण्यापासून थांबवण्यात आले. खेळाडूंच्या म्हणण्यानुसार, आधी आम्ही 8 वाजेपर्यंत सराव करायचो. परंतु नंतर सुरक्षा रक्षकांनी 7 वाजता खेळाडूंना ट्रॅकवरुन हटवण्यास सुरुवात केली.

तसेच, दिल्लीचे मुख्यमंत्री अरविंद केजरीवाल (Arvind Kejriwal) यांनी शहरातील सर्व सरकारी क्रीडा केंद्रे रात्री 10 वाजेपर्यंत सुरु ठेवण्याचे निर्देश दिले आहेत. उपमुख्यमंत्री मनिष सिसोदिया (Manish Sisodia) यांनी गुरुवारी ही माहिती दिली. एका आयएएस अधिकाऱ्याची बातमी प्रसारमाध्यमांमध्ये आल्यानंतर ही सूचना समोर आली आहे.

दुसरीकडे, IAS संजीव खिरवार यांनी संपूर्ण घटनेवर स्पष्टीकरण दिले आहे. ''माझ्यामुळे सराव बंद झाल्याची बाब निराधार आहे. मी क्वचितच कुत्र्यासोबत ट्रॅकवर जातो. जेव्हा खेळाडू नसतात तेव्हाच मी जातो. कधीही कोणत्याही खेळाडूला स्टेडियम (Stadium) सोडण्यास सांगितले नाही. मी सुद्धा कुत्र्याला तेव्हाच ट्रॅकवर सोडतो, जेव्हा तिथे कोणी नसते. जर ते आक्षेपार्ह असेल तर मी ते बंद करेन,'' असे खिरवार यांनी म्हटले आहे.