Hyderabad Professor Arrested: हैदराबाद विद्यापीठातील एका प्राध्यापकाला परदेशी विद्यार्थिनीशी छेडछाड केल्यावरून अटक करण्यात आली आहे. संबंधित विद्यार्थिनी थायलंडची असून पुस्तक देण्याच्या बहाण्याने प्राध्यापकाने घरी नेले होते, असे तिने सांगितले. तिथे त्यांनी जबरदस्तीने लैंगिक अत्याचार केल्याचे विद्यार्थिनीने म्हटले आहे.

(Hyderabad University Professor Molests Thailand Girl)

दरम्यान, या प्राध्यापकाला अटक करण्यात आलेली आहे. तसेच विद्यापीठानेही या प्राध्यापकाला निलंबित केले आहे. रवी रंजन असे या प्राध्यापकाचे नाव असून त्याचे वय 62 आहे. तो हिंदी विभागाचा प्राध्यापक आहे.

पोलिसांनी दिलेल्या माहितीनुसार, रवी रंजन यांनी साधारण 4 वाजण्याच्या सुमारास या विद्यार्थिनीला घरी नेले. पुस्तक देणार असल्याचे त्यांनी तिला सांगितले होते. त्यांनी रात्री 9 वाजता तिला पुन्हा विद्यापीठात सोडले. तेव्हा तिच्या मैत्रिणींना ती रडत असल्याचे दिसून आले. तिची विचारपुस केली असता प्राध्यापकाने लैंगिक अत्याचार केल्याचे तिने सांगितले. त्यानंतर पोलिसात तक्रार देण्यात आली. या विद्यार्थिनीला केवळ थाई भाषा येते.

ही घटना समोर आल्यानंतर विद्यापीठातील विद्यार्थी संघटनेने प्राध्यापकाला निलंबित करण्याची मागणी करत आंदोलन केले. संबंधित विद्यार्थिनी रात्रभर कुलसचिवांना फोन करत होती, मेसेज करत होती, पण पलीकडून काहीही उत्तर देण्यात आले नाही. विद्यापीठ हे प्रकरण दाबण्याचा प्रयत्न करत आहे. त्यामुळे कारवाईला उशीर होत आहे, असे विद्यार्थी संघटनेने म्हटले आहे. दरम्यान, या आंदोलनानंतरच या प्राध्यापकाला निलंबित केले असून अटकही करण्यात आली.