Gujarat s Morbi Cable Bridge Collapse: गुजरातमधील मोरबी येथे रविवारी संध्याकाळी एक धक्कादायक अपघात समोर आला आहे. मच्छू नदीतील पूल कोसळल्याने नदीत पडून 141 जणांचा मृत्यू झाला आहे. या अपघातात अनेक जण जखमीही झाले आहेत. प्राथमिक अहवालानुसार, पाच दिवसांपूर्वी नूतनीकरणानंतर केबल पूल पुन्हा सुरु करण्यात आला होता.

पूल कोसळल्याने अनेक लोक नदीत पडले. अपघातानंतर तातडीने बचावकार्य सुरु करण्यात आले आहे. पूल कोसळल्यानंतर नदीत पडलेल्या लोकांना बाहेर काढण्यासाठी प्रशासन स्थानिक लोकांच्या मदतीने प्रयत्न करत आहे. पंतप्रधानांनी मृतांच्या नातेवाईकांना प्रत्येकी दोन लाख रुपयांची भरपाई जाहीर केली आहे.

राष्ट्रपती द्रौपदी मुर्मू यांनीही ट्विट करत आपल्या संवेदना आणि प्रार्थना पीडितांसोबत असल्याचे म्हटले आहे.

दरम्यान, पूल कोसळल्याने अनेक लोक नदीत पडले. बचावकार्य सुरुच आहे. जखमींना रुग्णालयात नेण्यासाठी रुग्णवाहिका घटनास्थळी पोहोचली आहे. ही घटना उघडकीस आल्यानंतर लगेचच पंतप्रधान नरेंद्र मोदी (Prime Minister Narendra Modi) यांनी मुख्यमंत्री भूपेंद्र पटेल आणि इतर अधिकाऱ्यांशी अपघाताबाबत चर्चा केली. पंतप्रधानांनी परिस्थितीवर बारकाईने लक्ष ठेवण्यास आणि बाधित लोकांना शक्य ती सर्व मदत करण्यास सांगितले आहे.

दुसरीकडे, केंद्रीय गृहमंत्री अमित शाह (Amit Shah) यांनीही गुजरातचे गृहमंत्री हर्ष संघवी आणि इतर राज्य अधिकाऱ्यांशी बोलून स्थानिक प्रशासन मदतकार्यात गुंतले असल्याचे सांगितले. राष्ट्रीय आपत्ती निवारण दल (NDRF) देखील लवकरच घटनास्थळी पोहोचत आहे, असेही शाह म्हणाले.

तसेच, आम आदमी पार्टी (आप) प्रमुख आणि दिल्लीचे मुख्यमंत्री अरविंद केजरीवाल (Arvind Kejriwal) यांनीही या घटनेबद्दल शोक व्यक्त केला.