Chandrayaan-3 Mission भारताची तिसरी चांद्रमोहीम शुक्रवारपासून (ता.14) सुरू होणार आहे. यासाठी 25.30 तासांच्या उलट गणतीला आज दुपारी एक वाजून पाच मिनिटांनी सुरुवात झाली. ‘चांद्रयान -3’चे प्रक्षेपण उद्या दुपारी 2 वाजून 35 मिनिटांनी सतीश धवन केंद्रावरून होणार आहे.

इस्रो या भारतीय अवकाश संशोधन संस्थेचे अध्यक्ष एस. सोमनाथ यांनी श्रीहरीकोटापासून जवळ असलेल्या सुलुरपेठ गावातील श्री चेंगलम्मा परमेश्‍वरीनी मंदिराला आज भेट देऊन प्रार्थना केली.

शास्त्रज्ञांचे पथक बालाजीच्या चरणी

‘इस्रो’चे काही शास्त्रज्ञ तिरुपती येथे श्री बालाजीच्या दर्शनासाठी आले होते. या वृत्ताला तिरुमला तिरुपती देवस्थानच्या एका अधिकाऱ्यानेही दुजोरा दिला.

ते म्हणाले,की इस्रोचे एक पथक तिरुमलाला आले होते, पण आमच्या जनसंपर्क विभागाने त्यांच्या दौऱ्याला प्रसिद्धी दिली नाही. उच्च न्यायालयाचे न्यायाधीश आणि केंद्रीय वाहतूक मंत्री नितीन गडकरी यांच्या दौऱ्याच्या व्यवस्थेत मंदिराचे अधिकारी व्यग्र होते.